ក្រុមអាជ្ញាធរនិយាយនៅថ្ងៃពុធនេះថា យន្តហោះហ្វឹកហាត់យោធាជប៉ុនបានធ្លាក់នៅជិតបឹង ភ្លាមៗក្រោយពេលហោះឡើងជាមួយអាកាសយានិក ២នាក់នៅលើយន្តហោះ ។

រដ្ឋមន្រ្តីក្រសួងការពារជាតិជប៉ុនលោក Gen Nakatani និយាយប្រាប់ក្រុមអ្នកសារព័ត៌មានថា យន្តហោះហ្វឹកហាត់ T-4 របស់កងកម្លាំងស្វ័យការពារអាកាស បានធ្លាក់នៅវេលាម៉ោង ៣ និង៨នាទីរសៀលម៉ោងក្នុងស្រុក ក្រោយបាត់បង់រ៉ាដានៅជិតបឹង ក្រោយហោះចេញពីមូលដ្ឋានទ័ពអាកាស Komaki ស្ថិតនៅភាគកណ្តាលប្រទេសជប៉ុន ។

លោក Nakatani និយាយថា មនុស្ស ២នាក់ បាននៅលើយន្តហោះ ដោយលោកពុំបានបញ្ជាក់អត្តសញ្ញាណរបស់ពួកគេនោះទេ ។

លោកបន្តថា ពួកយើងពុំបានដឹងនោះទេថាតើមូលហេតុអ្វីបានបណ្តាលឲ្យយន្តហោះធ្លាក់ ប៉ុន្តែពួកយើងនឹងបន្តប្រឹងប្រែងអស់ពីសមត្ថភាពបំផុត ដើម្បីសង្រ្គោះអាយុជីវិតមនុស្សនៅលើយន្តហោះ ។

លោក Nakatani និយាយទៀតថា បំណែកយន្តហោះត្រូវបានរកឃើញនៅជិតកន្លែងកើតហេតុ ប៉ុន្តែគេនៅមិនទាន់ច្បាស់នោះទេថាតើ វាជាបំណែករបស់យន្តហោះធ្លាក់ឬយ៉ាងណា ។

យោងតាមការអះអាងនៅលើគេហទំព័រក្រសួងការពារជាតិជប៉ុន បានឲ្យដឹងថា យន្តហោះ T-4 មានកៅអី ២ ហើយត្រូវបានផលិតក្នុងស្រុក និងជាយន្តហោះហ្វឹកហាត់អាចទុកចិត្តបាន ៕