អធិការបតីអាល្លឺម៉ង់ លោក Friedrich Merz នៅថ្ងៃពុធ (ទី១៤ ខែឧសភា) នេះ បានជំរុញឲ្យលោកខាងលិចកុំបែកបាក់គ្នា ជុំវិញបញ្ហាអ៊ុយក្រែន ហើយបាននិយាយថា លោកកំពុងធ្វើការ ដើម្បីធានាឲ្យមានឯកភាព រវាងសម្ព័ន្ធមិត្ត នៅអឺរ៉ុប និងសហរដ្ឋអាមេរិក ពាក់ព័ន្ធនឹងរបៀបបញ្ចប់សង្រ្គាម។

នៅក្នុងសុន្ទរកថាដ៏សំខាន់លើកដំបូងរបស់លោកទៅកាន់សភា ចាប់តាំងពីចូលកាន់តំណែង កាលពីសប្តាហ៍មុន លោក Merz បានលើកឡើងថា លោកខាងលិចមិនអាចទទួលយកសន្តិភាពណាមួយ សម្រាប់ប្រទេសអ៊ុយក្រែន ដែលកើតមានតាមបញ្ជា ឬការចុះញ៉មនឹងស្ថានភាពបច្ចុប្បន្នដែលសម្រេចបានដោយកងកម្លាំងយោធារុស្ស៊ីនោះឡើយ។

ការនិយាយរបស់លោក បានកើតឡើងនៅមួយថ្ងៃមុនពេលប្រតិភូអ៊ុយក្រែន និងរុស្ស៊ី អាចជួបពិភាក្សាសន្តិភាព នៅទីក្រុងអ៊ីស្តង់ប៊ុល ប្រទេសទួរគី ពោលគឺមានរយៈពេលជាង ៣ឆ្នាំបន្ទាប់ពីការចាប់ផ្តើមនៃការមានជម្លោះដ៏អាក្រក់បំផុត នៅអឺរ៉ុប គិតចាប់តាំងពីសង្គ្រាមលោកលើកទី២។

បន្ទាប់ពីបានឈ្នះការបោះឆ្នោត កាលពីខែកុម្ភៈ Merz បានសន្យាថា នឹងធ្វើឲ្យអាល្លឺម៉ង់មាននូវតួនាទីកាន់តែធំ នៅលើឆាកអន្តរជាតិ និងបង្កើនកម្លាំងយោធារបស់ខ្លួន តាមរយៈការចំណាយលើវិស័យការពារជាតិបន្ថែម។ ហើយទោះបីជាលោកបានរិះគន់ជាសាធារណៈ ចំពោះរដ្ឋបាលរបស់ប្រធានាធិបតីអាមេរិក លោក Donald Trump ថា ជាសម្ព័ន្ធមិត្តមិនគួរទុកចិត្តបានក៏ដោយ ក៏នៅក្នុងសុន្ទរកថានាថ្ងៃពុធនេះ លោកបានអរគុណដល់លោក Trump សម្រាប់ការគាំទ្ររបស់លោក ក្នុងការជំរុញឲ្យមានបទឈប់បាញ់ នៅប្រទេសអ៊ុយក្រែន៕