ការិយាល័យសិទ្ធិមនុស្សអង្គការសហប្រជាជាតិ(UNHR) បានរាយការណ៍កាលពីថ្ងៃអង្គារថា រដ្ឋាភិបាលវេណេស៊ុយអេឡា បានបំភិតបំភ័យ និងបៀតបៀនអ្នកប្រឆាំង អ្នកសារព័ត៌មាន និងអ្នកការពារសិទ្ធិមនុស្ស បន្ទាប់ពីការបោះឆ្នោតជ្រើសរើសប្រធានាធិបតីឆ្នាំ ២០២៤ ។

អ្នកស្រី Luz Throssell គឺជាអ្នកនាំពាក្យរបស់ការិយាល័យ UNHR និយាយថា UNHR បានបញ្ជាក់ផ្ទៀងផ្ទាត់ករណីស្លាប់របស់ក្រុមអ្នករិះគន់រដ្ឋាភិបាលវេណេស៊ុយអេឡាយ៉ាងហោច ៣នាក់ ពេលដែលពួកគេស្ថិតនៅក្នុងការឃុំរបស់ក្រុមអាជ្ញាធរ ។

អ្នកស្រីបន្តថា ការិយាល័យរបស់ពួកយើងនៅតែព្រួយបារម្ភពីការឃុំឃាំង ជាពិសេសកង្វះខាតការចូលដល់ចំណីអាហារ និងការថែទាំសុខភាពគ្រប់គ្រាន់ ។

បន្ទាប់ពីការបោះឆ្នោតជ្រើសរើសប្រធានាធិបតីកាលពីខែកក្កដា ឆ្នាំ ២០២៤ ក្រុមប្រឹក្សារៀបចំការបោះឆ្នោតជាតិវេណេស៊ុយអេឡា (CNE) បានប្រកាសថា លោកប្រធានាធិបតី Nicolas Maduro គឺជាអ្នកឈ្នះឆ្នោត បើទោះបីជាពួកគេពុំដែលចេញផ្សាយលទ្ធផលបោះឆ្នោតសរុបក៏ដោយ ។

ក្រុមប្រឆាំងបានតវ៉ានឹងលទ្ធផលនេះ ដោយពួកគេប្រកាសមេដឹកនាំក្រុមប្រឆាំងលោក Edmundo Gonzalez គឺជាអ្នកឈ្នះ ជាមួយនឹងសំឡេងឆ្នោតសរុប ៧៣ភាគរយ ប្រមូលបានពីអ្នកគាំទ្រនៅតាមមណ្ឌលបោះឆ្នោតទូទាំងប្រទេសដែលបាននិយាយថា លោក Gonzalez រកបានសំឡេងឆ្នោតច្រើនជាងទ្វេដងលើលោក Maduro ។

បន្ទាប់ពីបាតុកម្មទូទាំងប្រទេសប្រឆាំងនឹងលទ្ធផលបោះឆ្នោតផ្លូវការ រដ្ឋាភិបាលវេណេស៊ុយអេឡា បានឃាត់ខ្លួនក្រុមបាតុកររាប់ពាន់នាក់ រួមទាំងសមាជិកជាន់ខ្ពស់របស់ក្រុមប្រឆាំងផងដែរ ។

យោងតាមការអះអាងរបស់ក្រុមសិទ្ធិមនុស្ស Foro Penal បានឲ្យដឹងថា គូប្រជែងនយោបាយយ៉ាងហោច ៨៩៤នាក់ បន្តនៅជាប់ក្នុងពន្ធនាគារ ៕