អាជ្ញាធរសុខាភិបាលក្នុងតំបន់បាននិយាយថា ការវាយប្រហារដោយយោធាអ៊ីស្រាអែល បានសម្លាប់ពលរដ្ឋប៉ាឡេស្ទីនយ៉ាងហោចណាស់៨០នាក់នៅទូទាំងតំបន់ហ្កាហ្សាស្ទ្រីបកាលពីថ្ងៃពុធ ក្នុងការកើនឡើងនៃការទម្លាក់គ្រាប់បែក ខណៈប្រធានាធិបតីសហរដ្ឋអាមេរិកលោក Donald Trump កំពុងធ្វើទស្សនកិច្ចនៅតំបន់មជ្ឈិមបូព៌ា។

ក្រុមគ្រូពេទ្យសង្គ្រោះបឋម បាននិយាយថា ភាគច្រើននៃអ្នកស្លាប់រួមមានស្ត្រី និងកុមារ ដែលត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលទៅលើលំនៅឋាននៅក្នុងតំបន់ Jabalia ភាគខាងជើងតំបន់ហ្កាហ្សា។ កាលពីល្ងាចថ្ងៃពុធ យោធាអ៊ីស្រាអែល បានចេញបញ្ជាជម្លៀសថ្មីដល់ប្រជាជននៅតាមស្រុកជាច្រើនក្នុងទីក្រុងហ្កាហ្សាដោយបង្ខំឱ្យប្រជាជនប៉ាឡេស្ទីនរាប់ពាន់នាក់ចាកចេញពីទីជម្រករបស់ពួកគេ។

តំបន់នានាដែលត្រូវបានគំរាមកំហែងដោយការព្រមានពីការជម្លៀស រួមមានទីជម្រកនៅតាមសាលារៀន និងមន្ទីរពេទ្យ Shifa ដ៏ធំបំផុត នេះបើយោងតាមផែនទីដែលចេញផ្សាយដោយកងទ័ពអ៊ីស្រាអែល។ សាក្សី និងក្រុមគ្រូពេទ្យបាននិយាយភ្លាមៗ បន្ទាប់ពីបទបញ្ជាជម្លៀសថា យន្តហោះអ៊ីស្រាអែល ធ្វើការវាយប្រហារតាមអាកាសជាច្រើនទៅលើគោលដៅនានានៅក្នុងទីក្រុងហ្កាហ្សា។

សារព័ត៌មានអ៊ីស្រាអែលកាលពីថ្ងៃពុធ បានដកស្រង់សម្តីមន្ត្រីសន្តិសុខដែលបាននិយាយថា ពួកគេជឿថាមេដឹកនាំយោធារបស់ក្រុមហាម៉ាស លោក Mohammad Sinwar និងមន្ត្រីជាន់ខ្ពស់ផ្សេងទៀតត្រូវបានសម្លាប់នៅក្នុងការវាយប្រហារកាលពីថ្ងៃអង្គារ ជាអ្វីដែលយោធាអ៊ីស្រាអែលបានពិពណ៌នាថាជាទីបញ្ជា ការនិងលេណដ្ឋានគ្រប់គ្រងស្ថិតនៅក្រោមមន្ទីរពេទ្យអឺរ៉ុបក្នុងទីក្រុង Khan Younis ភាគខាងត្បូងតំបន់ហ្កាហ្សា។