ប្រធានាធិបតីអាមេរិក លោក Donald Trump កាលពីថ្ងៃពុធសប្ដាហ៍នេះ បានអង្គុយពិសាតែជាមួយអតីតក្រុមជីហាដ ដែលមកទល់នឹងពេលថ្មីៗនេះ អាមេរិកធ្លាប់បានឲ្យប្រាក់រង្វាន់ចំនួន ១០លានដុល្លារសម្រាប់ក្បាលរបស់មេដឹកនាំស៊ីរីបច្ចុប្បន្ននេះ។

ប្រធានាធិបតីបណ្តោះអាសន្នស៊ីរីលោក Ahmed al-Sharaa ដែលធ្លាប់ស្គាល់ក្នុងក្រុមសកម្មប្រយុទ្ធរបស់លោកឈ្មោះ Abu Mohammed al-Jolani បានជួបលោក Trump ក្នុងទីក្រុង រីយ៉ាដ (Riyadh) ប្រាំមួយខែបន្ទាប់ពីការដឹកនាំយុទ្ធនាការដ៏ឆាប់រហ័ស និងបានផ្តួលរំលំរបបលោក Assad ដោយបណ្តេញក្រុមប្រដាប់អាវុធគាំទ្រដោយអ៊ីរ៉ង់ និងប្រកាសខ្លួនឯងជាមេដឹកនាំប្រទេសនេះ។

លោក Al Sharaa ត្រូវបានដាក់ក្នុងបញ្ជីភេរវករសកលដែលបានកំណត់ជាពិសេសរបស់សហរដ្ឋអាមេរិកក្នុងឆ្នាំ ២០១៣ សម្រាប់ការដឹកនាំក្រុមសម្ព័ន្ធរបស់អង្គការភេរវកម្ម al Qaeda ក្នុងប្រទេសស៊ីរី ដែលគេស្គាល់ថា Al Nusra Front ហើយត្រូវបានចោទប្រកាន់ថាបានរៀបចំការបំផ្ទុះគ្រាប់បែកអត្តឃាតទូទាំងប្រទេសស៊ីរី។

អតីតក្រុមជីហាដមានដើមកំណើតអារ៉ាប៊ីសាអ៊ូឌីតរូបនេះ បានចំណាយពេលជាច្រើនឆ្នាំប្រយុទ្ធជាមួយកងកម្លាំងសហរដ្ឋអាមេរិកក្នុងប្រទេសអ៊ីរ៉ាក់ មុនពេលផ្លាស់ទៅប្រទេសស៊ីរី ដើម្បីដឹកនាំការបះបោរអ៊ីស្លាមប្រដាប់អាវុធ ដែលបានបណ្តេញមេដឹកនាំលោក Bashar al-Assad ។

ជំនួបដែលត្រូវបានពិពណ៌នាដោយស៊ីរីថាជា "ប្រវត្តិសាស្ត្រ" គឺជាជំនួបដំបូងរវាងប្រធានាធិបតីអាមេរិក និងស៊ីរី ក្នុងរយៈពេល២៥ ឆ្នាំ ដែលធ្វើឡើងក្នុងអំឡុងដំណើរទស្សនកិច្ចរបស់លោក Trump នៅមជ្ឈិមបូព៌ា ជាប្រទេសទី១សម្រាប់ដំណើរទស្សនកិច្ចផ្លូវរដ្ឋលើកដំបូងក្នុងអាណត្តិទីពីររបស់លោក។

សេតវិមាននិយាយថា លោក Trump ស្នើឲ្យលោក Sharaa ចាត់វិធានការនានារួមទាំង ធ្វើប្រក្រតីភាពទំនាក់ទំនងជាមួយអ៊ីស្រាអែល បណ្ដេញភេរវករបរទេស និងប៉ាឡេស្ទីន និងជួយអាមេរិកទប់ស្កាត់ការងើបបះបោររបស់ក្រុម ISIS។លោក Trump បានប្រកាសថា លោកបានបញ្ជាឲ្យដកទណ្ឌកម្មពីស៊ីរី។

ការចុះផ្សាយមួយបែបវិភាគលើសារព័ត៌មានCNN បាននិយាយថា ការឱបក្រសោបរបស់លោក Trump ក្នុងប្រទេសស៊ីរី និងប្រធានាធិបតីប្រទេសនេះ ដែលប្រែក្លាយពីក្រុមជីហាដ អាចធ្វើឲ្យតំបន់មជ្ឈិមបូព៌ារង្គោះរង្គើ ៕