រដ្ឋមន្ត្រីការបរទេសមកពីប្រទេសសមាជិកសម្ព័ន្ធយោធាណាតូ បានមកជួបប្រជុំនៅប្រទេសទួរគី ដើម្បីពិភាក្សាអំពីបញ្ហាជាច្រើននៅមុនកិច្ចប្រជុំកំពូលនៅខែក្រោយ។ ការទាមទាររបស់ប្រធានាធិបតីសហរដ្ឋអាមេរិក លោក Donald Trump ឱ្យប្រទេសនានាបង្កើនការចំណាយលើវិស័យការពារជាតិរបស់ខ្លួន ស្ថិតក្នុងចំណោមប្រធានបទដែលកំពុងត្រូវបានពិភាក្សា។

រដ្ឋមន្ត្រី បានបើកកិច្ចប្រជុំរយៈពេលពីរថ្ងៃរបស់ខ្លួនចាប់តាំងពីថ្ងៃពុធ នៅទីក្រុង Antalya។ អគ្គលេខាធិការសម្ព័ន្ធយោធាណាតូ លោក Mark Rutte បានសម្តែងក្តីសង្ឃឹមថា កិច្ចព្រមព្រៀងស្តីពីការបង្កើនថវិកាការពារជាតិ នឹងត្រូវបានឈានដល់នៅក្នុងកិច្ចប្រជុំកំពូល NATO នៅខែក្រោយនៅក្នុងប្រទេសហូឡង់។

លោកនិយាយថា សមាជិកនឹង «កសាងរួមគ្នាដើម្បីឱ្យមានកិច្ចប្រជុំកំពូលដ៏អស្ចារ្យនៅក្នុងទីក្រុងឡាអេ»។

លោក Trump បានជំរុញឱ្យប្រទេសសមាជិកណាតូ បង្កើនការចំណាយលើវិស័យការពារជាតិដល់ ៥ ភាគរយនៃផលិតផលក្នុងស្រុកសរុប(GDP) របស់ពួកគេ។

នៅមុនពេលកិច្ចប្រជុំ លោក Rutte បាននិយាយថា សមាជិកទាំងអស់ គួរតែបង្កើនការចំណាយលើវិស័យការពារជាតិដល់៣,៥ភាគរយនៃផលិតផលក្នុងស្រុកសរុប(GDP) របស់ខ្លួននៅឆ្នាំ២០៣២។ លោកបាននិយាយបន្ថែមថា ប្រទេសសមាជិកគួរតែចំណាយបន្ថែម១,៥ភាគរយនៃ GDP របស់ខ្លួនលើទំនិញដែលទាក់ទងនឹងសន្តិសុខ។ លោក អគ្គលេខាធិការ និយាយថា វានឹងអាចឱ្យប្រទេសនានា សម្រេចបាននូវគោលដៅ ៥ភាគរយរបស់លោក Trump ។