នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម(Anwar Ibrahim) បាននិយាយថា លោកបានពិភាក្សាអំពីការធ្លាក់យន្តហោះម៉ាឡេស៊ី MH17 ជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន(Vladimir Putin) ក្នុងអំឡុងទស្សនកិច្ចនៅទីក្រុងមូស្គូ ប៉ុន្មានថ្ងៃបន្ទាប់ពីរបាយការណ៍របស់អង្គការសហប្រជាជាតិ បានរកឃើញថា រុស្ស៊ីទទួលខុសត្រូវចំពោះមហន្តរាយនេះ។

លោកបានប្រាប់ប្រព័ន្ធផ្សព្វផ្សាយម៉ាឡេស៊ីកាលពីថ្ងៃពុធថា «ពិតណាស់ ក្នុងនាមជាតំណាងរបស់ប្រជាជនម៉ាឡេស៊ី ជាពិសេសក្រុមគ្រួសារជនរងគ្រោះ ខ្ញុំបានឆ្លៀតឱកាសដើម្បីលើកយកបញ្ហានេះមកពិភាក្សាជាមួយប្រធានាធិបតី លោក វ្ល៉ាឌីមៀ ពូទីន ក្នុងអំឡុងពេលជំនួបទ្វេភាគីរបស់យើង»។

លោក Anwar ត្រូវបានស្នើឱ្យធ្វើអត្ថាធិប្បាយលើការវិវឌ្ឍន៍ថ្មីៗទាក់ទងនឹងការរកឃើញការទទួលខុស ត្រូវដែលធ្វើឡើងដោយក្រុមប្រឹក្សាអាកាសចរណ៍អង្គការសហប្រជាជាតិ។

ក្រុមប្រឹក្សាអង្គការអាកាសចរណ៍ស៊ីវិលអន្តរជាតិ (ICAO) បានរកឃើញនៅសប្តាហ៍នេះថា រុស្ស៊ីជាអ្នកទទួលខុសត្រូវចំពោះការធ្លាក់យន្តហោះ MH17 ដែលត្រូវបានបាញ់ទម្លាក់នៅភាគខាងកើតប្រទេសអ៊ុយក្រែនក្នុងឆ្នាំ២០១៤ អំឡុងពេលប្រយុទ្ធគ្នារវាងក្រុមផ្តាច់ខ្លួនគាំទ្ររុស្ស៊ី និងកងកម្លាំងអ៊ុយក្រែន។

ទីក្រុងមូស្គូ បានច្រានចោលការរកឃើញរបស់ក្រុមប្រឹក្សាអង្គការអាកាសចរណ៍ស៊ីវិលអន្តរជាតិ (ICAO) លើការធ្លាក់យន្តហោះដែលបានសម្លាប់អ្នកដំណើរនិងនាវិកទាំងអស់ចំនួន២៩៨នាក់ ដោយចាត់ទុកការចេញសេចក្តីសម្រេចនេះថាមានភាពលំអៀង។ លោក Anwar បាននិយាយនៅក្នុងការបង្ហោះតាមបណ្តាញហ្វេសប៊ុកកាលពីល្ងាចថ្ងៃពុធថា លោកនឹងបន្តជំរុញឲ្យមានការទទួលខុសត្រូវជុំវិញមហន្តរាយនេះ។