ប្រជាជនប៉េរូរាប់រយនាក់ បានដើរដង្ហែទៅកាន់អគារសភា ក្នុងទីក្រុង Lima កាលពីថ្ងៃពុធ (ទី១៤ ខែឧសភា) ដោយខ្លះអំពាវនាវដល់សម្តេចប៉ាប ឡេអូទី ១៤ (Pope Leo XIV) ដែលកាន់សញ្ជាតិប៉េរូ ឲ្យគាំទ្រការប្រយុទ្ធរបស់ពួកគេប្រឆាំងនឹងអសន្តិសុខ ដែលកំពុងកើនឡើង នៅក្នុងប្រទេសនេះ។

កូដកម្មថ្នាក់ជាតិ បាននាំក្រុមបាតុករ ទៅកាន់ទីក្រុង Lima ជាកន្លែងដែលភាពតានតឹង បានកើនឡើងនៅពេលដែលក្រុមបាតុករ បានប៉ះទង្គិចជាមួយនគរបាលប្រឆាំងកុបកម្មនៅជិតសភា។

បាតុករជាច្រើន បានកាន់បដា ដោយអំពាវនាវដល់សម្តេចប៉ាប ឡេអូ ទី១៤ ដែលជាសម្តេចប៉ាបអាមេរិក- ប៉េរូដំបូងគេ ធ្វើអន្តរាគមន៍។ មានដើមកំណើតមកពីទីក្រុង Chicago សម្តេចប៉ាប ឡេអូ ទី១៤ បានចំណាយពេលភាគច្រើននៃជីវិតបព្វជិតរបស់ព្រះអង្គ ជាអ្នកផ្សព្វផ្សាយសាសនា នៅប្រទេសប៉េរូ ជាកន្លែងដែលក្រោយមកព្រះអង្គ បានក្លាយជាពលរដ្ឋដែលមានសញ្ជាតិប៉េរូ។ ព្រះអង្គ ត្រូវបានដំឡើងតំណែងជាន់ខ្ពស់ នៅឆ្នាំ ២០២៣។

តួលេខរបស់រដ្ឋាភិបាល បង្ហាញថា ឃាតកម្មនៅក្នុងប្រទេសប៉េរូ បានកើនឡើងជាងមួយភាគបី ក្នុងឆ្នាំកន្លងទៅ ដោយកើនឡើងពី ១.៥០៨ករណី ក្នុងឆ្នាំ ២០២៣ ដល់ ២.០៥៩ករណី ក្នុងឆ្នាំ ២០២៤។ អំពើហិង្សាជាច្រើន ត្រូវបានផ្សារភ្ជាប់ជាមួយនឹងក្រុមឧក្រិដ្ឋជន ដែលតែងតែកំណត់គោលដៅអាជីវកម្ម រួមទាំងក្រុមហ៊ុនដឹកជញ្ជូនផងដែរ។