ជាការចង់បានយ៉ាងខ្លាំង ក្នុងការទទួលយកយន្តហោះពីប្រទេសកាតា លោក Donald Trump បានសម្រេចបាននូវសិមិទ្ធផលដ៏គួរឲ្យកត់សម្គាល់ ដោយបានបង្រួបបង្រួមសមាជិកភាគច្រើននៃគណបក្សទាំង២ របស់សហរដ្ឋអាមេរិក ដែលមានការបែកបាក់ផ្នែកនយោបាយយ៉ាងខ្លាំងក្លា។

តែបញ្ហាសម្រាប់សេតវិមាននោះ គឺថា ការរួបរួមគ្នា កំពុងកើតឡើងប្រឆាំងនឹងការចង់បាននោះ។ តាមការរំពឹងទុក គូប្រជែងរបស់លោក Trump នៅក្នុងគណបក្សប្រជាធិបតេយ្យ បានរិះគន់លោកប្រធានាធិបតី បន្ទាប់ពីលោកបានចង្អុលបង្ហាញថា លោកនឹងទទួលយកយន្តហោះប្រណិតមួយគ្រឿង ពីគ្រួសាររាជវង្សនៃប្រទេសកាតា។

អ្វីដែលគួរឲ្យកត់សម្គាល់ជាងនេះទៅទៀត និងបញ្ហាដែលអាចកើតមាន សម្រាប់លោកប្រធានាធិបតីនោះ គឺថា អ្នកគាំទ្រខ្លាំងបំផុតមួយចំនួនរបស់លោក ក៏មាននូវលក្ខខណ្ឌយ៉ាងធ្ងន់ធ្ងរ ចំពោះកិច្ចព្រមព្រៀងនេះផងដែរ ទោះបីជាវាមិនទាន់ត្រូវបានបញ្ចប់ក៏ដោយ។

អ្នកមានឥទ្ធិពលមកពីក្រុម Maga (ធ្វើឲ្យអាមេរិកអស្ចារ្យម្ដងទៀត) បានពណ៌នាចំណាត់ការនេះថា ជា «សំណូក» អំណោយ ឬឧទាហរណ៍នៃអំពើពុករលួយកម្រិតខ្ពស់ ដែលលោក Trump ខ្លួនឯងបានសន្យាយ៉ាងខ្ជាប់ខ្ជួនថា នឹងលុបបំបាត់។

គួរបញ្ជាក់ថា គ្រួសាររាជវង្សកាតាគ្រោងនឹងផ្តល់យន្តហោះដ៏ប្រណិត Boeing 747-8 ដែលត្រូវបានប៉ាន់ស្មានថា មានតម្លៃ ៤០០លានដុល្លារ ដល់ក្រសួងការពារជាតិសហរដ្ឋអាមេរិក ដើម្បីប្រើប្រាស់ជាផ្នែកនៃកងយន្តហោះដែលមានឈ្មោះថា Air Force One ដែលជាវិធីធ្វើដំណើរតាមផ្លូវអាកាសផ្លូវការរបស់ប្រធានាធិបតី។

សេតវិមានបានលើកឡើងថា យន្តហោះថ្មីដែលអាចត្រូវការប្រាក់រាប់លានដុល្លា ដើម្បីជួសជុល និងធ្វើឲ្យប្រសើរឡើង នឹងត្រូវផ្ទេរទៅកាន់បណ្ណាល័យលោកប្រធានាធិបតី Trump នៅចុងបញ្ចប់នៃអាណត្តិរបស់លោក។ តែយ៉ាងណាក្ដី បន្ទាប់ពីព័ត៌មាននេះបានលេចឡើង កាលពីថ្ងៃអាទិត្យចុងសប្ដាហ៍កន្លងមក ប្រតិកម្មខ្លាំងៗ និងភ្លាមៗ ក៏កើតមានដែរ៕