កោះតៃវ៉ាន់បានរាយការណ៍ពីការកើនឡើងនូវសកម្មភាពរបស់កងទ័ពរំដោះប្រជាជនចិន (PLA) នៅក្បែរដែនកោះស្វ័យគ្រប់គ្រង ក្នុងរយៈពេល ៥ថ្ងៃកន្លងមកនេះ ខណៈដែលយោធារបស់ខ្លួន បានធ្វើសមយុទ្ធបាញ់គ្រាប់ពិតជាបន្តបន្ទាប់ ដើម្បីសាកល្បងយុទ្ធសាស្ត្រការពារដែនកោះ។

ស្ថាប័នការពារដែនកោះនេះ នៅថ្ងៃព្រហស្បតិ៍ (ទី១៥ ខែឧសភា) បានរាយការណ៍ថា មានយន្តហោះចំនួន ២៩គ្រឿង និងនាវា ៩គ្រឿង ដែលកំពុងប្រតិបត្តិការនៅក្បែរកោះ ក្នុងរយៈពេល ២៤ម៉ោង គិតចាប់ពីម៉ោង ៦ព្រឹកថ្ងៃពុធ (ម៉ោងក្នុងស្រុក)។

ស្ថាប័ននេះបានបន្ថែមថា យន្តហោះសរុប ១៨គ្រឿងបានឆ្លងកាត់ខ្សែមេដ្យាននៅក្នុងច្រកសមុទ្រតៃវ៉ាន់ រវាងកោះតៃវ៉ាន់ និងចិនដីគោក ដោយបានល្បាតនៅផ្នែកខាងជើង និងភាគនិរតីនៃកោះនេះ។

នេះគឺជារយៈពេល ៤ថ្ងៃជាប់គ្នា ដែលស្ថាប័ននេះបានរាយការណ៍អំពីយន្តហោះយោធាចំនួន ៣០គ្រឿង នៅក្បែរកោះនេះ។ ក្នុងរយៈពេល ៣ខែកន្លងមកនេះ មានសេចក្ដីរាយការណ៍រយៈពេល ១២ថ្ងៃហើយ អំពីយន្តហោះជាង ៣០គ្រឿង នៅជិតកោះនេះ។ ចំនួននេះបាននាំឲ្យចំនួនសរុបរយៈពេល ៥ថ្ងៃមានយន្តហោះដល់ទៅ ១៦១គ្រឿង ដែលត្រូវបានប្រទះឃើញនៅក្បែរកោះនេះ។

ជាមួយគ្នានេះ កោះតៃវ៉ាន់ក៏បានឲ្យដឹងដែរថា PLA បានធ្វើ «ការល្បាតត្រៀមប្រយុទ្ធរួមគ្នា» កាលពីថ្ងៃអាទិត្យចុងសប្ដាហ៍កន្លងមក ដែលពាក់ព័ន្ធនឹងយន្តហោះ ៣០គ្រឿង ក្នុងនោះរួមមានទាំងយន្តហោះចម្បាំងទំនើប J-16 យន្តហោះព្រមានទុកជាមុន KJ-500 និងយានដ្រូន។ តែយ៉ាងណាក្ដី PLA មិនបាននិយាយអំពីការមានប្រតិបត្តិការណាមួយឡើយ៕

នៅថ្ងៃព្រហស្បតិ៍នេះ កោះតៃវ៉ាន់ បានបន្តជាមួយនឹងថ្ងៃទី៣ នៃការសាកល្បងសមត្ថភាពវាយប្រហារប្រឆាំងការឡើងគោក និងរយៈចម្ងាយដ៏ជាក់លាក់របស់ខ្លួន ហើយបានសាកល្បងប្រព័ន្ធរ៉ូកែតកាំភ្លើងធំចល័តកម្រិតខ្ពស់ដែលផ្គត់ផ្គង់ដោយសហរដ្ឋអាមេរិក ឬ Himars ដោយលើកដំបូងកាលពីថ្ងៃអង្គារ៕