ប្រមុខអង្គការណាតូលោក Mark Rutte និយាយប្រាប់ក្រុមអ្នកសារព័ត៌មាននៅថ្ងៃព្រហស្បតិ៍នេះថា គ្រាប់បាល់ច្បាស់ណាស់ថាឥឡូវស្ថិតលើទីលានប្រកួតរបស់រុស្ស៊ី ក្នុងការបោះជំហានបន្ទាប់ ក្នុងកិច្ចប្រជុំសន្តិភាពជាមួយអ៊ុយក្រែន ។

ថ្លែងក្នុងបទសម្ភាសន៍នៅមាត់ច្រកចូល មុនពេលជំនួបក្រៅផ្លូវការរបស់ពួកគេ លោក Rutte និយាយថា អង្គការណាតូ ប្រាកដណាស់ថា ពួកគេនឹងជួយជាសមូហភាពដល់អ៊ុយក្រែន ដើម្បីនាំឲ្យសង្រ្គាមមួយនេះ ទទួលបានសន្តិភាពយូរអង្វែង ។ 

លោកបន្តថា ពួកយើងគួរតែអរគុណសហរដ្ឋអាមេរិក និងលោកប្រធានាធិបតី Donald Trump កាលដែលភាពទាល់ច្រកត្រូវបានបំបែក ។ 

លោកថា ពួកយើងត្រៀមខ្លួនរួចរាល់ក្នុងការអង្គុយជជែកពិភាក្សាជាមួយរុស្ស៊ី ព្រមព្រៀងលើបទឈប់បាញ់ ចរចាភ្លាមៗពីជំហានបន្ទាប់ ដើម្បីបញ្ចប់សង្រ្គាមដ៏អាក្រក់មួយនេះ ។

លោក Rutte និយាយទៀតថា អ៊ុយក្រែន ត្រៀមខ្លួនរួចរាល់ក្នុងការប្តេជ្ញាចិត្តចំពោះបទឈប់បាញ់ និងការចរចាបន្ទាន់ ។ រឿងនេះគឺច្បាស់ខ្លាំងណាស់ គ្រាប់បាល់ច្បាស់ណាស់ថាស្ថិតនៅលើទីលានប្រកួតរបស់រុស្ស៊ីនាពេលឥឡូវនេះ ។ ពួកគេត្រូវតែពន្យល់ពីអ្វីដែលពួកគេនឹងត្រូវធ្វើ ហេតុផលដែលពួកគេមកទីនេះ ឬមិនមកទីនេះ ។

លោកបញ្ជាក់ថា ប៉ុន្តែពួកយើងត្រូវប្រាកដថា ពួកយើងយល់ច្បាស់ថា គ្រាប់បាល់នៅលើទីលានប្រកួតរបស់ពួកគេ ។ អ៊ុយក្រែនរង់ចាំតែចាប់ផ្តើមចរចាប៉ុណ្ណោះ ឲ្យបានឆាប់តាមដែលអាចធ្វើទៅបាន ៕