រដ្ឋមន្ត្រីការបរទេសអាមេរិក លោក Marco Rubio បាននិយាយថា ជម្លោះរវាងរុស្ស៊ី និងអ៊ុយក្រែន មិនអាចដោះស្រាយ ដោយយោធាបានទេ។

ប្រមុខការទូតអាមេរិករូបនេះ បាននិយាយនៅពេលមកដល់ទីក្រុង Antalya ដើម្បីចូលរួមកិច្ចក្រៅផ្លូវការនៃរដ្ឋមន្ត្រីការបរទេសណាតូថា៖«ពុំមានដំណោះស្រាយយោធាចំពោះជម្លោះរុស្ស៊ី-អ៊ុយក្រែនទេ។ សង្រ្គាមនេះ នឹងត្រូវបញ្ចប់ មិនមែនតាមរយៈដំណោះស្រាយយោធាទេ គឺតាមរយៈផ្លូវទូត»។ 

លោក Rubio ក៏បានកត់សម្គាល់ឃើញដែរថា ស្ថានភាពជុំវិញការដោះស្រាយជម្លោះអ៊ុយក្រែន នៅតែមានភាពស្មុកស្មាញ ប៉ុន្តែសហរដ្ឋអាមេរិកសង្ឃឹមថា នឹងមានការរីកចម្រើនក្នុងពេលឆាប់ៗនេះ នៅក្នុងដំណើរការចរចា។

កាលពីថ្ងៃទី ១១ ខែឧសភា ប្រធានាធិបតីរុស្ស៊ី លោក វ្ល៉ាឌីមៀ ពូទីន ( Vladimir Putin) ដែលបាននិយាយទៅកាន់អ្នកសារព័ត៌មាន នៅវិមានក្រឹមឡាំង បានស្នើឲ្យអាជ្ញាធរទីក្រុងគីវ ចាប់ផ្តើមឡើងវិញដោយគ្មានបុរេលក្ខខណ្ឌ ដែលការចរចាដោយផ្ទាល់អ៊ុយក្រែន ត្រូវបានបញ្ឈប់នៅឆ្នាំ ២០២២ ដោយស្នើឲ្យ ចាប់ផ្តើមការសន្ទនា នៅថ្ងៃទី ១៥ ខែឧសភា នៅទីក្រុងអ៊ីស្តង់ប៊ុល ប្រទេសទួរគី។ ចំណែកលោក វ្ល៉ូឌីមី ហ្សេឡិនស្គី បាននិយាយថា លោកនឹងមកដល់ទីក្រុងអ៊ីស្តង់ប៊ុល នៅថ្ងៃព្រហស្បតិ៍នេះ។ សេចក្តីថ្លែងការណ៍របស់លោក បានធ្វើឡើងបន្ទាប់ពីប្រធានាធិបតីអាមេរិកលោក ដូណាល់ ត្រាំ បានជំរុញឲ្យអ៊ុយក្រែនយល់ព្រមភ្លាមៗចំពោះកិច្ចពិភាក្សាដែលស្នើឡើងដោយមេដឹកនាំរុស្ស៊ី។ មុននេះ ហ្សេឡិនស្គី បានកំណត់លក្ខខណ្ឌក្នុងការចរចា ជាមួយទីក្រុងមូស្គូស្តីពីការដាក់ចេញបទឈប់បាញ់រយៈពេលមួយខែ។

មន្ត្រីសេតវិមានម្នាក់ បាននិយាយកាលពីថ្ងៃទី ១៣ ខែឧសភាថា រដ្ឋមន្ត្រីការបរទេសអាមេរិក លោក Marco Rubio បេសកជនពិសេសប្រធានាធិបតីលោក Steve Witkoff និងបេសកជនពិសេសសម្រាប់អ៊ុយក្រែនលោក Keith Kellogg នឹងធ្វើដំណើរ ទៅកាន់ទីក្រុងអ៊ីស្តង់ប៊ុល។