ប្រធានាធិបតីអាមេរិក លោក Donald Trump នៅថ្ងៃព្រហស្បតិ៍ (ទី១៥ ខែឧសភា) នេះ បាននិយាយថា លោកនៅតែអាចធ្វើដំណើរទៅប្រទេសទួរគី ដើម្បីចូលរួមកិច្ចចរចាដោយផ្ទាល់លើកដំបូង រវាងរុស្ស៊ី និងអ៊ុយក្រែន ប្រសិនបើមានវឌ្ឍនភាព ពោលគឺជាដំណើរការដែលត្រូវបានរៀបចំឡើងក្នុងគោលបំណងបញ្ចប់សង្រ្គាមរយៈពេលជាង ៣ឆ្នាំរបស់ប្រទេស២។

ពីប្រទេសកាតា លោក Trump បាននិយាយថា៖ «អ្នកដឹងទេ ប្រសិនបើមានអ្វីកើតឡើង ខ្ញុំនឹងទៅនៅថ្ងៃសុក្រ ប្រសិនបើវាមើលទៅសមស្រប»។ លោកបានបន្ថែមថា៖ «យើងអាចជួយពិភពលោកឲ្យកាន់តែមានក្ដីសង្ឃឹម។ ដូច្នេះ យើងគិតថា យើងនឹងធ្វើបានល្អជាមួយរុស្ស៊ី និងអ៊ុយក្រែន»។

លោក Trump បាននិយាយមួយថ្ងៃមុននេះថា លោកនឹងទៅប្រទេសទួរគី សម្រាប់កិច្ចពិភាក្សានេះ ប្រសិនបើប្រធានាធិបតីរុស្ស៊ីលោក Vladimir Putin មានវត្តមាននៅទីនោះ។ ផ្ទុយទៅវិញ រុស្ស៊ីនឹងបញ្ជូនគណៈប្រតិភូវ័យកម្រិតទាបបន្ថែមទៀត បើទោះបីជាប្រធានាធិបតីអ៊ុយក្រែន លោក Volodymyr Zelensky ជំរុញឲ្យលោក Putin ចូលរួម ដើម្បីបញ្ជាក់ថា លោកពិតជាយកចិត្តទុកដាក់ ចំពោះសន្តិភាពក៏ដោយ។

លោក Trump បានលើកឡើងថា លោកមិនភ្ញាក់ផ្អើលទេដែលលោក Putin អវត្តមាន ដោយនិយាយថា «ហេតុអ្វីបានជាគាត់ត្រូវទៅ បើខ្ញុំមិនទៅផង?»។ លោក Trump ពេលចូលកាន់តំណែង បានសន្យាថា នឹងបញ្ចប់សង្រ្គាមភ្លាមៗ ប៉ុន្តែរុស្ស៊ីបានបដិសេធសំណើរបស់សហរដ្ឋអាមេរិកដែលគាំទ្រដោយអ៊ុយក្រែន សម្រាប់បទឈប់បាញ់ដោយគ្មានលក្ខខណ្ឌរយៈពេល ៣០ថ្ងៃ៕