អ្នកជំងឺ និងអ្នកអមដំណើរពួកគេ ត្រូវបានមើលឃើញជម្លៀសខ្លួនចេញពីមន្ទីរពេទ្យ Al Shifa ស្ថិតក្នុងទីក្រុងហ្កាហ្សាកាលពីថ្ងៃពុធ បន្ទាប់ពីពួកគេនិយាយថា វាគឺជាបទបញ្ជាជម្លៀសខ្លួនរបស់អ៊ីស្រាអែល ។

 ម្តាយរបស់អ្នកជំងឺ Manal Al-Ankar និយាយថា មន្ទីរពេទ្យនេះត្រូវបានគេជូនដំណឹងឲ្យជម្លៀសចេញ ។ ដូចអ្នកឃើញស្រាប់ហើយ គ្រែពេទ្យរាប់រយគ្រែ អ្នករងរបួសរាប់រយនាក់ តើពួកគេគួរទៅកន្លែងណា? តើពួកយើងគួរទៅកន្លែងណា?

 អ្នកស្រីបន្តថា ពួកយើងពុំដឹងថាតើគួរទៅកន្លែងណានោះទេជាមួយអ្នកជំងឺទាំងនេះ ពួកយើងជម្លៀសពីកន្លែងស្លាប់មួយ ទៅកន្លែងស្លាប់មួយទៀត ។

 គួរឲ្យដឹងថា ការវាយប្រហាររបស់អ៊ីស្រាអែល បានសម្លាប់ជនប៉ាឡេស្ទីនយ៉ាងហោច ៨០នាក់នៅទូទាំងតំបន់ហ្កាហ្សាស្រ្ទីប កាលពីថ្ងៃពុធ ដែលជាការទម្លាក់គ្រាប់បែកដ៏ខ្លាំងក្លាមួយ ស្របពេលប្រធានាធិបតីសហរដ្ឋអាមេរិកបំពេញទស្សនកិច្ចនៅតំបន់មជ្ឈិមបូព៌ា ។

 ក្រុមគ្រូពេទ្យបឋម និយាយថា ភាគច្រើននៃអ្នកស្លាប់ដែលរួមទាំងស្រ្តី និងកុមារនោះ ត្រូវបានសម្លាប់នៅក្នុងការវាយប្រហារតាមច្រកអាកាសរបស់អ៊ីស្រាអែលលើផ្ទះមួយខ្នង នៅតំបន់ Jabalia ស្ថិតនៅភាគខាងជើងហ្កាហ្សា ។

 អ៊ីស្រាអែលបានវាយប្រហារតំបន់ហ្កាហ្សា ជាការសងសឹកនឹងការវាយប្រហារដឹកនាំដោយក្រុមហាម៉ាស លើតំបន់ភាគខាងត្បូងអ៊ីស្រាអែលកាលពីថ្ងៃទី ៧ ខែតុលា ឆ្នាំ ២០២៣ ពេលដែលមនុស្ស ១.២០០នាក់ ត្រូវបានសម្លាប់ ហើយមនុស្ស ២៥១នាក់ផ្សេងទៀត ត្រូវបានចាប់ធ្វើជាចំណាប់ថ្នូរ ។

យោងតាមការអះអាងរបស់ក្រុមមន្រ្តីសុខភាពក្នុងស្រុក បានឲ្យដឹងថា យុទ្ធនាការយោធារបស់អ៊ីស្រាអែលចាប់តាំងពីពេលនោះមក បានសម្លាប់ជនប៉ាឡេស្ទីនជាង ៥២.៩០០នាក់ និងធ្វើឲ្យតំបន់ហ្កាហ្សាស្ថិតលើមាត់ជ្រោះជិតធ្លាក់ក្នុងគ្រោះទុរ្ភិក្ស ៕