សំណុំផ្សែងខ្មៅយ៉ាងក្រាស់ បានផុសពីលើអាកាស ពេលដែលអគ្គិភ័យដ៏ធំមួយបានឆាបឆេះឃ្លាំងចែកចាយផលិតគីមីមួយកន្លែង ជិតទីក្រុង Seville នៅភាគខាងត្បូងប្រទេសអេស្ប៉ាញ ។

អ្នកនាំពាក្យសេវាកម្មសង្រ្គោះបន្ទាន់ក្នុងតំបន់និយាយប្រាប់ទីភ្នាក់ងារព័ត៌មានរ៉យទ័រថា ពួកគេទទួលបានការទូរស័ព្ទចូលរាប់រយលើក ចាប់ផ្តើមនៅវេលាម៉ោងប្រហែល ១ និង ២០នាទី រសៀល ម៉ោងក្នុងស្រុក ប្រកាសអាសន្នដល់ពួកគេថា មានអគ្គិភ័យឆាបឆេះមួយនៅឧទ្យានឧស្សាហកម្ម La Red ស្ថិតក្នុងទីក្រុង Alcala de Guadaira ចម្ងាយប្រហែល ១៦គ.ម ភាគអាគ្នេយ៍ទីក្រុង Seville ។

អ្នកនាំពាក្យរូបនោះបន្តថា ក្រុមកម្មករនៅក្នុងឃ្លាំងដែលជាកម្មសិទ្ធិរបស់ក្រុមហ៊ុនចែកចាយផលិតផលគីមីក្នុងស្រុក Plainsu រាយការណ៍ថា គ្មានអ្នករងរបួស ឬបុគ្គលិកជាប់ខ្លួនក្នុងឃ្លាំងនោះទេ ។

សាលាក្រុង Alcala de Guadaira និយាយថា មនុស្សប្រហែល ៧៧.០០០នាក់ ត្រូវបានណែនាំឲ្យបិទទ្វារ-បង្អួចផ្ទះរបស់ពួកគេ ខណៈជាតិពុលរបស់ផ្សេង នៅពុំទាន់ដឹងច្បាស់ ។ ចំណែកឯឃ្លាំងជិតគ្នា ត្រូវបានជម្លៀសមនុស្សចេញផងដែរ ៕