លោកប្រធានាធិបតី Volodymyr Zelensky នៅថ្ងៃព្រហស្បតិ៍ (ទី១៥ ខែឧសភា) នេះ បាននិយាយថា ប្រទេសអ៊ុយក្រែននឹងសម្រេចលើជំហានបន្ទាប់ ក្នុងដំណើរការចរចាជាមួយរុស្ស៊ី ក្រោយលោកបានជួបប្រជុំជាមួយប្រធានាធិបតីទួរគី លោក Tayyip Erdogan។

នៅឯអាកាសយានដ្ឋានរបស់ទីក្រុងអង់ការ៉ា លោក Zelensky បានប្រាប់អ្នកសារព័ត៌មានថា កម្រិតនៃគណៈប្រតិភូរុស្ស៊ីដែលបានបញ្ជូនទៅកាន់ប្រទេសទួរគី សម្រាប់កិច្ចពិភាក្សា មានកម្រិតទាប និងអាណត្តិមិនច្បាស់លាស់។

លោក Zelensky បាននិយាយថា៖ «សម្រាប់កម្រិតមន្ត្រីនៃភាគីរុស្ស៊ី (គណៈប្រតិភូ) ខ្ញុំមិនបានស្គាល់ជាផ្លូវការនោះទេ ប៉ុន្តែតាមអ្វីដែលយើងឃើញ វាហាក់ដូចជាកម្រិតដែលត្រូវបានតុបតែងឡើងឲ្យតែល្អមើល។ យើងត្រូវដឹងថា តើគណៈប្រតិភូរុស្ស៊ី មានកម្រិតណា ហើយតើពួកគេមានអាណត្តិអ្វី និងថា តើពួកគេអាចធ្វើការសម្រេចណាមួយបាន ឬអត់»។

ជាមួយគ្នានេះ លោក Zelensky បានបញ្ជាក់ថា គណៈប្រតិភូអ៊ុយក្រែន រួមមានរដ្ឋមន្ត្រីការបរទេស យោធា និងប្រធានចារកម្ម ព្រមទាំងមន្ត្រីជាន់ខ្ពស់មកពីការិយាល័យរបស់លោកផងដែរ៕