ប្រទេសចិននឹងពង្រីកគោលនយោបាយលើកលែងទិដ្ឋាការរបស់ខ្លួនដល់ប្រជាជននៃប្រេស៊ីល អាហ្សង់ទីន ឈីលី ប៉េរូ និងអ៊ុយរូហ្គាយ ដោយលើកកម្រិតប្រទេសមានសេដ្ឋកិច្ចធំៗជាងគេបំផុតមួយចំនួន នៅតំបន់អាមេរិកឡាទីនស្មើជាមួយប្រទេសជាច្រើន នៅអឺរ៉ុប និងអាស៊ី ខណៈដែលទីក្រុងប៉េកាំងប្រឹងប្រែងពង្រឹងទំនាក់ទំនងកាន់តែរឹងមាំជាមួយតំបន់នេះ។

អំឡុងសន្និសីទសារព័ត៌មានប្រចាំថ្ងៃ នៅថ្ងៃព្រហស្បតិ៍ (ទី១៥ ខែឧសភា) នេះ អ្នកនាំពាក្យក្រសួងការបរទេសចិន លោក Lin Jian បានប្រាប់ឲ្យដឹងថា កិច្ចព្រមព្រៀងលើកលែងទិដ្ឋាការ នឹងមានប្រសិទ្ធភាពចាប់ពីថ្ងៃទី១ ខែមិថុនា សម្រាប់រយៈពេល ១ឆ្នាំ។

ប្រេស៊ីល អាហ្សង់ទីន និងឈីលី គឺជាប្រទេស នៅក្នុងចំណោមប្រទេសដែលមានសេដ្ឋកិច្ចធំបំផុតជាងគេទាំង៥ នៅក្នុងតំបន់របស់ពួកគេ។ ការធ្វើដំណើរទៅប្រទេសចិន មិនចាំបាច់មានទិដ្ឋាការ សម្រាប់ប្រទេសអឺរ៉ុបភាគច្រើន ក៏ដូចជាប្រទេសជិតខាងរបស់ខ្លួន គឺជប៉ុន និងកូរ៉េខាងត្បូង ចាប់តាំងពីឆ្នាំមុនមក។

សេចក្តីប្រកាសនេះបានកើតឡើងបន្ទាប់ពីមាននូវវេទិកាដ៏ធំមួយ ក្នុងចំណោមមន្ត្រីចិន និងអាមេរិកឡាទីន និងការ៉ាអ៊ីព នៅទីក្រុងប៉េកាំង កាលពីដើមសប្តាហ៍នេះ ដែលប្រធានាធិបតីចិន លោក ស៊ី ជីនពីង (Xi Jinping) បានប្តេជ្ញាជំរុញវត្តមានរបស់ប្រទេសចិន ជាមួយនឹងឥណទាន និងការវិនិយោគហេដ្ឋារចនាសម្ព័ន្ធថ្មីៗចំនួន ៩ពាន់លានដុល្លារ៕