រដ្ឋមន្ត្រីការបរទេសសហរដ្ឋអាមេរិក លោក Marco Rubio បាននិយាយកាលពីថ្ងៃព្រហស្បតិ៍ ទី១៥ ឧសភា ថា វិធីតែមួយគត់ដែលការទម្លាយភាពទាល់ច្រកនឹងកើតឡើងនៅក្នុងកិច្ចខិតខំប្រឹងប្រែងដើម្បីបញ្ចប់សង្រ្គាមរបស់រុស្ស៊ីនៅអ៊ុយក្រែន គឺតាមរយៈការចរចាដោយផ្ទាល់រវាងលោកប្រធានាធិបតី Donald Trump និងប្រធានាធិបតីរុស្ស៊ី លោក Vladimir Putin បន្ទាប់ពីទីក្រុងមូស្គូ បានបញ្ជូនក្រុមការងារថ្នាក់ទាបទៅចរចានៅប្រទេសទួរគី។

លោក Rubio បាននិយាយទៅកាន់អ្នកសារព័ត៌មាននៅទីក្រុង Antalya ថា លោកនឹងធ្វើដំណើរទៅកាន់ទីក្រុង Istanbul សម្រាប់កិច្ចប្រជុំនៅថ្ងៃសុក្រនេះជាមួយរដ្ឋមន្ត្រីការបរទេសទួរគី លោក Hakan Fidan និងគណៈប្រតិភូអ៊ុយក្រែន ប៉ុន្តែបាននិយាយថា លោកពុំមានការរំពឹងទុកខ្ពស់សម្រាប់កិច្ចចរចានោះទេ។ លោក Rubio បាននិយាយថា «ខ្ញុំមិនគិតថា យើងនឹងមានការទម្លាយភាពទាល់ច្រកនៅទីនោះទេ រហូតដល់ប្រធានាធិបតី Donald Trump និងលោកប្រធានាធិបតី Putin ធ្វើអន្តរកម្មដោយផ្ទាល់លើប្រធានបទនេះ។ អ្នកការទូតជាន់ខ្ពស់របស់សហរដ្ឋអាមេរិក បានពណ៌នាស្ថានភាពបច្ចុប្បន្ននៃកិច្ចចរចាដើម្បីបញ្ចប់សង្គ្រាមថាមានភាព «ជាប់គាំង» និងបាននិយាយថា លោក Trump គឺជាមនុស្សតែម្នាក់គត់ដែលអាចម្លាយភាពទាល់ច្រកនេះបាន។

ប្រធានាធិបតីអ៊ុយក្រែន លោក Volodymyr Zelenskyy បានធ្វើដំណើរទៅកាន់ប្រទេសទួរគី បន្ទាប់ពីលោក Putin បានស្នើសុំកិច្ចចរចានៅទីនោះ មុនពេលប្រធានាធិបតីរុស្ស៊ីបានសម្រេចចិត្តមិនធ្វើដំណើរទៅជួបចរចាដោយខ្លួនឯងផ្ទាល់។ជំនួសមកវិញ លោក Putin បានបញ្ជូនក្រុមការងារថ្នាក់ទាប និងអនុរដ្ឋមន្ត្រីទៅកាន់ទីក្រុងអ៊ីស្តង់ប៊ុល។ លោក Rubio និយាយថា កម្រិតនៃមន្ត្រីដែលរុស្ស៊ីបញ្ជូនទៅ ពុំមែនជាការបង្ហាញនូវការទម្លាយភាពទាល់ច្រកនោះទេ ប៉ុន្តែបាននិយាយថា លោក Trump មានឆន្ទៈក្នុងការបន្តកិច្ចពិភាក្សា រហូតទទួលបានសន្តិភាព។