ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃព្រហស្បតិ៍ ទី១៥ ឧសភា ថា លោកបានជំរុញឱ្យក្រុមហ៊ុន Apple ផលិតនូវផលិតផលរបស់ខ្លួននៅក្នុងសហរដ្ឋអាមេរិក ជំនួសឱ្យការផលិតនៅក្នុងប្រទេសឥណ្ឌា ដែលក្រុមហ៊ុនបច្ចេកវិទ្យាយក្សរបស់សហរដ្ឋអាមេរិកមួយនេះបាននិយាយថា ក្រុមហ៊ុននឹងផ្លាស់ប្តូរការផលិត បន្ទាប់ពីការដំឡើងពន្ធរបស់អាមេរិកលើប្រទេសចិន។

លោក Trump បាននិយាយថា «ខ្ញុំមានបញ្ហាតិចតួចជាមួយ លោក Tim Cook» ដោយនិយាយសំដៅទៅលើនាយកប្រតិបត្តិរបស់ក្រុមហ៊ុន Apple ក្នុងអំឡុងពេលដំណើរទស្សនកិច្ចច្រើនថ្ងៃទៅកាន់ប្រទេសឈូងសមុទ្រ។ «ខ្ញុំបាននិយាយថា លោក Tim យើងពិតជាបានធ្វើល្អចំពោះអ្នក។ យើងបានដំឡើងរោងចក្រទាំងអស់ដែលអ្នកបានសាងសង់នៅក្នុងប្រទេសចិនអស់រយៈពេលជាច្រើនឆ្នាំមកហើយ» ។

លោកប្រធានាធិបតី បាននិយាយថា លោកបានប្រាប់លោក Cook ថា «យើងមិនចាប់អារម្មណ៍លើអ្នកដែលបានសាងសង់នៅក្នុងប្រទេសឥណ្ឌានោះទេ យើងចង់ឱ្យអ្នកសាងសង់នៅទីនេះ ហើយក្រុមហ៊ុនបង្កើនផលិតកម្មរបស់ខ្លួននៅក្នុងសហរដ្ឋអាមេរិក»។

កាលពីថ្ងៃច័ន្ទដើមសប្តាហ៍នេះ សហរដ្ឋអាមេរិក និងចិន បានប្រកាសកិច្ចព្រមព្រៀងដើម្បីផ្អាកការដំឡើងពន្ធសងសឹករយៈពេល៩០ថ្ងៃ ដោយកាត់បន្ថយសង្គ្រាមពាណិជ្ជកម្មដែលបានធ្វើឱ្យទីផ្សារហិរញ្ញវត្ថុរង្គោះរង្គើរ និងបង្កើនការព្រួយបារម្ភនៃការធ្លាក់ចុះសេដ្ឋកិច្ចពិភពលោក។