​បាល់ទាត់៖ ​ការប្រកួត​របស់ Manchester United ធ្វើដំណើរ​ទៅ​ទឹកដី​របស់ Brentford រាត្រី​ថ្ងៃ​អង្គារ​នេះ​ត្រូវបាន​លើក​ពេល​ហើយ ​បន្ទាប់ពី​ផ្ទុះ​ឆ្លង Covid-19 ច្រើន​នាក់​ក្នុង​ក្លិប​នៅ Old Trafford​។ ​​Premier League បានបញ្ជាក់​ថា ​នេះ​ជាការ​សំរេចចិត្ត​មួយ​ស្របទៅតាម​វិធាន​សុខាភិបាល ដើម្បី​ទប់ស្កាត់​ការរីក​រាលដាល​ឆ្លង​កាន់តែខ្លាំង​។

​​ទីលាន​ហ្វឹកហាត់ Carrington របស់ Manchester United ត្រូវបាន​បិទទ្វា​នៅ​ថ្ងៃ​ចន្ទ​ម្សិលមិញ បន្ទាប់ពី​មាន​ដំណឹង​ថា​មាន​អ្នក​ឆ្លង Covid-19 ច្រើន​នាក់​ទៅលើ​បុគ្គលិក​ក្លិប និង​កីឡាករ​មួយចំនួន​។ ​​សប្តាហ៍​មុន Premier League បាន​រកឃើញ​ករណី​ឆ្លង​ថ្មី​សរុប ៤២ករណី​លើ​កីឡាករ និង​បុគ្គលិក​ក្លិប​ក្រោយពី​ការធ្វើ​តេស្ត​លើ​ក្លិប​ពាក់ព័ន្ធ​ទាំងអស់​។ ​​Brighton, Spurs, Leicester, Aston Villa និង Norwich សុទ្ធតែ​ក្លិប​ដែលមាន​ករណី​ឆ្លង​កាលពី​ថ្ងៃអាទិត្យ ស្របពេល​ជំនួប​រវាង Brighton និង Spurs ត្រូវបាន​លើក​ពេល​ផងដែរ​ ក្រោយ​ក្លិប​នៅ​ទីក្រុង​ឡុង​ដ៍​ឆ្លងច្រើន​នាក់​នៅក្នុង​ក្លិប​។

​​រំលឹកថា ​មុន​ការប្រកួត​នៅ​ទឹកដី Norwich កាលពី​ថ្ងៃ​សៅរ៍​កីឡាករ និង​សមាជិក​ក្លិប​ទាំងអស់​របស់ Manchester United សុទ្ធតែ​តេស្ត​អវិជ្ជមាន​ទាំងអស់ លុះ​ក្រោយ​ការប្រកួត​នៅ​ថ្ងៃអាទិត្យ​ Man United ក៏​រកឃើញ​ករណី​វិជ្ជមាន​មួយចំនួន​ដែល​គេ​សង្ស័យថា​ ឆ្លង​ពី​ភាគី Norwich​។ ​សូមបញ្ជាក់ថា ​អឺរ៉ុប​កំពុង​ឈានដល់​រលក​ថ្មី​នៃ​ការផ្ទុះ​ឆ្លង​មេរោគ Covid-19 ខណៈ​ចក្រភព​អង់គ្លេស​ទើប​ប្រកាស​ចាប់ផ្តើម​យុទ្ធនា​ការចាក់​វ៉ាក់សាំង​ដូ​ស​ទី៣ ប៉ុណ្ណោះ​៕

​អត្ថបទ​៖​នាង សុភា​វុ​ធ