ប្រជាជនប៉ាឡេស្ទីន បានប្រារព្ធទិវា ណាក់បា (Nakba) ឬហៅថា ទិវានៃការជម្លៀសខ្លួនទ្រង់ទ្រាយធំចេញពីទឹកដីកំណើត នៅថ្ងៃព្រហស្បតិ៍ (១៥ ឧសភា) សប្ដាហ៍នេះ ដោយរំលឹកឡើងវិញដល់ការបាត់បង់ទឹកដីរបស់ពួកគេ បន្ទាប់ពីសង្រ្គាមឆ្នាំ១៩៤៨ នៅឯទឹកដីកំណើតនៃរដ្ឋអ៊ីស្រាអែល ខណៈប្រតិបត្តិការយោធារបស់អ៊ីស្រាអែលនៅដែនដីហ្កាហ្សា និងតំបន់កាន់កាប់ វេសបែង បានធ្វើឱ្យមនុស្សរាប់សែននាក់ភ័យខ្លាចការជម្លៀសទ្រង់ទ្រាយធំបែបនោះម្តងទៀត។

ពាក្យ ណាក់បា ឬប្រែថា "មហន្តរាយ" គឺជាបទពិសោធន៍ដ៏អាក្រក់មិនអាចបំភ្លេចបានមួយសម្រាប់ជនជាតិប៉ាឡេស្ទីនអស់ពេលជាង ៧៥ឆ្នាំមកហើយ ដែលជាពេលវេលាកំណត់អត្តសញ្ញាណជាតិរបស់ពួកគេ និងជះស្រមោលលើទំនាក់ទំនងជម្លោះប៉ាឡេស្ទីនជាមួយអ៊ីស្រាអែល ចាប់តាំងពីពេលនោះមក។

ភាពភ័យខ្លាចនៃការជម្លៀសខ្លួនទាំងហ្វូងបានកើតឡើងម្ដងទៀត ហើយត្រូវបានពង្រីកដោយសង្រ្គាមនៅហ្កាហ្សា និងយុទ្ធនាការជាច្រើនខែរបស់កងទ័ពអ៊ីស្រាអែល នៅក្នុងជំរំជនភៀសខ្លួន វេសបែង ជាទីដែលកូនចៅប៉ាឡេស្ទីនរាប់សែននាក់ ដែលបានបាត់បង់ផ្ទះសម្បែងរបស់ពួកគេក្នុងឆ្នាំ១៩៤៨ បានរត់ទៅរស់នៅអស់ជាច្រើនទសវត្សរ៍។

ទិវារំលឹកខួប ១៥ ឧសភា នៃព្រឹត្តិការណ៍ ណាក់បា គឺជាការចាប់ផ្តើមនៃសង្រ្គាមឆ្នាំ១៩៤៨ នៅពេលដែលរដ្ឋអារ៉ាប់ជិតខាង បានវាយប្រហារអ៊ីស្រាអែល រយៈពេលមួយថ្ងៃប៉ុណ្ណោះបន្ទាប់ពីរដ្ឋថ្មីនេះបានប្រកាសឯករាជ្យរបស់ខ្លួន ក្រោយការដកកងកម្លាំងអង់គ្លេសចេញពីអ្វីដែលហៅថាទឹកដីប៉ាឡេស្ទីន៕