តុលាការកំពូលរបស់សហរដ្ឋអាមេរិក បានខ្វែងគំនិតគ្នាកាលពីថ្ងៃព្រហស្បតិ៍ (១៥ ឧសភា) ជុំវិញការប៉ុនប៉ងរបស់លោកប្រធានាធិបតី Donald Trump ដើម្បីអនុវត្តយ៉ាងទូលំទូលាយនូវក្រឹត្យរឹតបន្តឹងសិទ្ធិទួលបានសញ្ជាតិជាពលរដ្ឋពីកំណើតរបស់លោក នៅក្នុងជំហានមួយដែលនឹងប៉ះពាល់ដល់ទារករាប់ពាន់នាក់ដែលកើតជារៀងរាល់ឆ្នាំ ខណៈលោកចង់បង្កើតការផ្លាស់ប្តូរដ៏ធំនៅក្នុងរដ្ឋធម្មនុញ្ញអាមេរិក។

ចៅក្រមអភិរក្សនិយមរបស់តុលាការ ដែលមានសំឡេងភាគច្រើន៦-៣ ហាក់ដូចជាមានឆន្ទៈយល់ស្របលើរឹតបន្តឹងសមត្ថភាពរបស់តុលាការជាន់ទាបក្នុងការចេញដីកាទូទាំងប្រទេស ឬ ដីកា "ជាសកល" ដូចដែលចៅក្រមសហព័ន្ធនៅរដ្ឋ Maryland, Washington និង Massachusetts បានធ្វើដើម្បីរារាំងក្រឹត្យរបស់លោក Trump។ ទោះយ៉ាងនេះក្តី ពុំមានចៅក្រមរូបណាបានបង្ហាញការយល់ព្រមលើក្រឹត្យរបស់លោក Trump ឡើយ ហើយក្រុមសេរីនិយមមួយចំនួននិយាយថា ការរឹតត្បឹតសិទ្ធិជាពលរដ្ឋពីកំណើត បំពានរដ្ឋធម្មនុញ្ញ និងច្បាប់ដើមរបស់តុលាការ។

ចៅក្រមបានបើកសវនាការជជែកវែកញែកជាង ២ម៉ោង នៅក្នុងសំណើបន្ទាន់របស់រដ្ឋបាលទាមទារឱ្យដកដីកាដែលរារាំងក្រឹត្យរបស់លោក Trump ជាផ្នែកសំខាន់នៃវិធីសាស្រ្តប្រកាន់ជំហរតឹងរបស់លោកលើអន្តោប្រវេសន៍។ ចៅក្រមបីរូបរកឃើញថា ក្រឹត្យរបស់លោក Trump ទំនងជាបំពានលើប្រការសញ្ជាតិនៃវិសោធនកម្មលើកទី១៤ របស់រដ្ឋធម្មនុញ្ញ។

គួរឱ្យដឹងថា លោក Trump បានចុះហត្ថលេខាលើក្រឹត្យរឹតបន្តឹងសិទ្ធជាពលរដ្ឋពីកំណើតនៅថ្ងៃទី២០ ខែមករា ដោយបញ្ជាឱ្យភ្នាក់ងារសហព័ន្ធ បដិសេធមិនទទួលស្គាល់សញ្ជាតិរបស់កុមារកើតនៅអាមេរិក ដែលមិនមានឪពុកម្តាយយ៉ាងហោចណាស់ម្នាក់ជាពលរដ្ឋអាមេរិក ឬជាអ្នករស់នៅអចិន្ត្រៃយ៍ស្របច្បាប់ ឬត្រូវគេស្គាល់ថាជាអ្នកកាន់ "បណ្ណបៃតង"។ ទារកទើបនឹងកើតច្រើនជាង ១៥០.០០០នាក់ នឹងត្រូវបដិសេធមិនទទួលបានសញ្ជាតិជារៀងរាល់ឆ្នាំ ប្រសិនបើក្រឹត្យរបស់លោក Trump ចូលជាធរមាន នេះបើយោងតាមដើមបណ្តឹងដែលបានជំទាស់នឹងក្រឹត្យនេះ៕