ប្រទេសឥណ្ឌា និងប៉ាគីស្ថាន បានចោទប្រកាន់គ្នាទៅវិញទៅមកកាលពីថ្ងៃព្រហស្បតិ៍ ទី១៥ ឧសភា ពីការគ្រប់គ្រងមិនបានល្អអាវុធនុយក្លេអ៊ែរ ដោយអំពាវនាវឱ្យពិភពលោកត្រួតពិនិត្យឃ្លាំងអាវុធរបស់ប្រទេសជិតខាងខ្លួន ប៉ុន្មានថ្ងៃបន្ទាប់ពីការប្រឈមមុខដាក់គ្នាផ្នែកយោធាខ្លាំងក្លាបំផុត ក្នុងរយៈពេលពីរទសវត្សរ៍មកនេះ។

រដ្ឋមន្ត្រីការពារជាតិឥណ្ឌា លោក Rajnath Singh បាននិយាយថា ឃ្លាំងអាវុធនុយក្លេអ៊ែររបស់ប្រទេសប៉ាគីស្ថាន គួរតែស្ថិតនៅក្រោមការឃ្លាំមើលរបស់ទីភ្នាក់ងារថាមពលអាតូមិករបស់អង្គការសហប្រជាជាតិ ខណៈទីក្រុង Islamabad បាននិយាយថា សហគមន៍អន្តរជាតិគួរតែស៊ើបអង្កេត «ទីផ្សារងងឺត» នៅក្នុងប្រទេសឥណ្ឌា។

ជម្លោះចុងក្រោយរវាងឥណ្ឌា និងប៉ាគីស្ថាន បានបង្កឱ្យមានការព្រួយបារម្ភជាសកល ថា វាអាចធ្លាក់ចូលទៅក្នុងសង្រ្គាមពេញបន្ទុក មុនពេលបទឈប់បាញ់ត្រូវបានសម្របសម្រួល។ លោក Singh បាននិយាយទៅកាន់ទាហាននៅឯមូលដ្ឋានមួយកន្លែងក្នុងតំបន់កាស្មៀរគ្រប់គ្រងដោយឥណ្ឌាថា «ខ្ញុំចង់លើកបញ្ហានេះសម្រាប់ពិភពលោក ថាតើ អាវុធនុយក្លេអ៊ែរមានសុវត្ថិភាពដែរឬទេដែលស្ថិតនៅក្នុងដៃរបស់ប្រទេសទុច្ចរិត និងខ្វះការទទួលខុសត្រូវ?។

លោក Singh បាននិយាយបន្ថែមថា «ខ្ញុំជឿថា អាវុធបរមាណូរបស់ប៉ាគីស្ថាន គួរតែត្រូវបាននាំយកឲ្យស្ថិតក្រោមការឃ្លាំមើលរបស់ទីភ្នាក់ងារថាមពលអាតូមិកអន្តរជាតិ(IAEA)។

ប៉ុន្មានម៉ោងក្រោយមក រដ្ឋមន្ត្រីការបរទេសប៉ាគីស្ថាន លោក Ishaq Dar បាននិយាយថា ទីភ្នាក់ងារ IAEA គួរតែធ្វើការស៊ើបអង្កេតជំនួសវិញ «ការលួច និងការជួញដូរខុសច្បាប់ដដែលៗ ពាក់ព័ន្ធនឹងសម្ភារៈនុយក្លេអ៊ែរ និងសារធាតុវិទ្យុសកម្មនៅក្នុងប្រទេសឥណ្ឌា»។