អង្គការសហប្រជាជាតិ បាននិយាយកាលពីថ្ងៃព្រហស្បតិ៍ ទី១៥ ឧសភា ថា ស្ថាប័ននេះនឹងមិនចូលរួមក្នុងប្រតិបត្តិការមនុស្សធម៌ដែលគាំទ្រដោយសហរដ្ឋអាមេរិកនៅក្នុងតំបន់ហ្កាហ្សានោះទេ ខណៈអ៊ីស្រាអែល បានសន្យាជួយសម្រួលដល់កិច្ចខិតខំប្រឹងប្រែងដោយមិនពាក់ព័ន្ធទៅនឹងការដឹកជញ្ជូនជំនួយ។

អ្នកនាំពាក្យរងរបស់អង្គការសហប្រជាជាតិ លោក Farhan Haq បាននិយាយទៅកាន់អ្នកសារព័ត៌មានកាលពីថ្ងៃព្រហស្បតិ៍ថា «ផែនការផ្តល់ជំនួយដ៏ពិសេសនេះ មិនស្របតាមគោលការណ៍ជាមូលដ្ឋានរបស់យើង រួមទាំងគោលការណ៍មិនលំអៀង អព្យាក្រឹតភាព និងឯករាជ្យភាព ហើយយើងនឹងមិនចូលរួមក្នុងរឿងនេះទេ»។ មូលនិធិមនុស្សធម៌តំបន់ហ្កាហ្សាដែលគាំទ្រដោយសហរដ្ឋអាមេរិក នឹងចាប់ផ្តើមការងារនៅហ្កាហ្សានៅចុងខែឧសភា ក្រោមផែនការចែកចាយដែលត្រូវបានរិះគន់យ៉ាងខ្លាំង។ មូលនិធិនេះ ក៏បានស្នើឱ្យអ៊ីស្រាអែល ពង្រីកចំនួនកំណត់ដំបូងនៃទីតាំងចែកចាយជំនួយសុវត្ថិភាពនៅភាគខាងត្បូងតំបន់ហ្កាហ្សា រហូតដល់ភាគខាងជើងនៃតំបន់ហ៊ុមព័ទ្ធមួយនេះ ក្នុងរយៈពេល៣០ថ្ងៃ។

គ្មានជំនួយមនុស្សធម៌ណាមួយត្រូវបានដឹកជញ្ជូនទៅកាន់តំបន់ហ្កាហ្សានោះទេ ចាប់តាំងពីថ្ងៃទី២ ខែមីនា ហើយអង្គការឃ្លាំមើលភាពអត់ឃ្លានសកល បានព្រមានថាមនុស្សកន្លះលាននាក់ប្រឈមភាពអត់ឃ្លានដែលមានមួយភាគបួននៃចំនួនប្រជាជននៅក្នុងតំបន់ហ៊ុមព័ទ្ធនេះ ខណៈអ៊ីស្រាអែល និងក្រុមសកម្មប្រយុទ្ធហាម៉ាសប៉ាឡេស្ទីន ធ្វើសង្រ្គាមចាប់តាំងពីខែតុលា ឆ្នាំ២០២៣។

អ៊ីស្រាអែល បានចោទប្រកាន់ក្រុមហាម៉ាសពីបទលួចជំនួយ ដែលក្រុមនេះបានបដិសេធ ហើយកំពុងរារាំងការដឹកជញ្ជូនជំនួយមនុស្សធម៌ទៅកាន់តំបន់ហ្កាហ្សា លុះត្រាតែក្រុមហាម៉ាស ដោះលែងចំណាប់ខ្មាំងដែលនៅសល់ទាំងអស់។ អ៊ីស្រាអែល និងសហរដ្ឋអាមេរិក បានជំរុញឱ្យអង្គការសហប្រជាជាតិ និងក្រុមផ្តល់ជំនួយ សហការជាមួយផ្នែកជំនួយមនុស្សធម៌តំបន់ហ្កាហ្សាគាំទ្ររដោយអាមេរិក(GHF)។ ទោះបីជាយ៉ាងណាក៏ដោយ ពួកគេបានលើកឡើងពីការព្រួយបារម្ភថា ប្រតិបត្តិការនេះនឹងមិនប្រកាន់ខ្ជាប់នូវគោលការណ៍មនុស្សធម៌នៃភាពមិនលំអៀង ឯករាជ្យភាព និងអព្យាក្រឹតភាព ទេ។