ទិន្នន័យបានបង្ហាញនៅថ្ងៃសុក្រ ទី១៦ ខែឧសភានេះ ថា សេដ្ឋកិច្ចរបស់ប្រទេសជប៉ុន បានធ្លាក់ចុះជាលើកដំបូង ក្នុងល្បឿនលឿនជាងការរំពឹងទុក ដែលបង្ហាញពីភាពផុយស្រួយនៃការស្ទុះងើបឡើងវិញរបស់ខ្លួន ដែលបច្ចុប្បន្នស្ថិតនៅក្រោមការគំរាមកំហែងពីគោលនយោបាយពាណិជ្ជកម្មរបស់ប្រធានាធិបតីសហរដ្ឋអាមេរិក លោក Donald Trump ។

ទិន្នន័យនេះបង្ហាញពីបញ្ហាប្រឈមដែលអ្នកបង្កើតគោលនយោបាយត្រូវប្រឈមមុខ ខណៈការដំឡើងពន្ធរបស់សហរដ្ឋអាមេរិក ធ្វើឱ្យស្មុគស្មាញដល់ចក្ខុវិស័យសម្រាប់សេដ្ឋកិច្ចនាំចេញ ជាពិសេសសម្រាប់វិស័យរថយន្តជាចម្បង។

ការប្រើប្រាស់ឯកជនដែលមានជាងពាក់កណ្តាលនៃទិន្នផលសេដ្ឋកិច្ចរបស់ប្រទេសជប៉ុន បានធ្លាក់ចុះនៅក្នុងត្រីមាសទីមួយ បើធៀបនឹងការព្យាករណ៍ទីផ្សារសម្រាប់ការកើនឡើង ០,១% ។ ទិន្នន័យបានបង្ហាញថាតម្រូវការខាងក្រៅឬការនាំចេញសុទ្ធ បានធ្លាក់ចុះ០,៨ ភាគរយនៃកំណើនផលិតផលក្នុងស្រុកសរុប(GDP)។ សង្គ្រាមពាណិជ្ជកម្មពិភពលោក ដែលបានបញ្ឆេះដោយការដំឡើងពន្ធដ៏ច្រើនរបស់លោក Trump បានធ្វើឱ្យទីផ្សារហិរញ្ញវត្ថុរង្គោះរង្គើរ និងធ្វើឱ្យមានភាពស្មុគស្មាញដល់ការសម្រេចចិត្តរបស់ធនាគារកណ្តាលរបស់ប្រទេសជប៉ុន។

ខណៈការថមថយភាពតានតឹងពាណិជ្ជកម្មរវាងសហរដ្ឋអាមេរិក និងប្រទេសចិន បានធ្វើឱ្យទីផ្សារ និងអ្នកបង្កើតគោលនយោបាយមានភាពធូរស្រាលមួយចំនួន វានៅតែមានភាពមិនច្បាស់លាស់ថាតើប្រទេសជប៉ុនអាចទទួលបានការលើកលែងពីការដំឡើងពន្ធរបស់សហរដ្ឋអាមេរិក នៅក្នុងកិច្ចពិភាក្សាពាណិជ្ជកម្មទ្វេភាគីជាមួយទីក្រុងវ៉ាស៊ីនតោនដែរ ឬយ៉ាងណា។