ការិយាល័យកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយកាលពីថ្ងៃព្រហស្បតិ៍ (១៥ ឧសភា) ថា អរិភាពកាន់តែខ្លាំងក្លានៅតែបន្តក្នុងតំបន់ហ្កាហ្សាស្ទ្រីប ដែលនាំមកនូវការស្លាប់ ការភៀសខ្លួន និងការបំផ្លិចបំផ្លាញបន្ថែមទៀត ស្របពេលការបិទជំនួយរយៈពេលជាច្រើនសប្តាហ៍កំពុងដំណើរការ។ បន្ថែមពីលើការទម្លាក់គ្រាប់បែកដែលកំពុងបន្ត អ៊ីស្រាអែលបានចេញបទបញ្ជាជម្លៀសថ្មីចំនួន៣ ផ្សេងទៀតក្នុងពេលពីរថ្ងៃកន្លងមក ដែលគ្របដណ្តប់ ៧% នៃផ្ទៃដីហ្កាហ្សាសរុប ប៉ះពាល់ដល់មនុស្សប្រមាណ ១០ម៉ឺននាក់។

សរុបមក ប្រហែល ៧១% នៃតំបន់ហ្កាហ្សាស្ទ្រីប ស្ថិតនៅក្រោមបញ្ជាជម្លៀស ឬនៅក្នុងតំបន់ដែលគ្រប់គ្រងដោយយោធាអ៊ីស្រាអែល ដែលអាជ្ញាធរអ៊ីស្រាអែលទាមទារឱ្យក្រុមមនុស្សធម៌សម្របសម្រួលការផ្លាស់ទីរបស់ពួកគេ។ ទីភ្នាក់ងារអង្គការសហប្រជាជាតិនេះនិយាយថា "បញ្ជាជម្លៀសទាំងនេះកើតឡើងនៅពេលដែលប្រជាជននៅទូទាំងតំបន់ហ្កាហ្សា ប្រឈមនឹងគ្រោះទុរ្ភិក្ស ហើយមនុស្សម្នាក់ក្នុងចំណោមមនុស្ស ៥នាក់ ប្រឈមនឹងភាពអត់ឃ្លានដ៏អាក្រក់"។

OCHA រាយការណ៍ថា បញ្ជាជម្លៀសដែលប្រកាសកាលពីថ្ងៃព្រហស្បតិ៍ បានប៉ះពាល់ដល់អ្នកស្រុករាប់ម៉ឺននាក់ក្នុង ១០តំបន់ នៅក្រុង Deir Al-Balah និង Khan Younis ដោយ "យោងតាមការប៉ាន់ប្រមាណបឋម តំបន់ដែលរងផលប៉ះពាល់ថ្មី គឺជាជម្រករបស់មនុស្សប្រហែល ១០០.០០០នាក់"។

ដៃគូមនុស្សធម៌របស់អង្គការសហប្រជាជាតិរាយការណ៍ថា ប្រជាពលរដ្ឋជាច្រើនរយគ្រួសារ បានភៀសខ្លួនចេញពីផ្នែកខ្លះនៃតំបន់ដែលបានកំណត់កាលពីថ្ងៃពុធសប្ដាហ៍នេះ ប៉ុន្តែមនុស្សរាប់រយនាក់បានត្រឡប់ទៅកន្លែងចាស់វិញដោយសារតែខ្វះខាតកន្លែងស្នាក់នៅ និងទីជម្រក៕