រដ្ឋមន្រ្តីសន្តិសុខមាតុភូមិលោកស្រី Kristi Noem បាននិយាយកាលពីថ្ងៃព្រហស្បតិ៍ថា ទីភ្នាក់ងារអនុវត្តច្បាប់របស់សហរដ្ឋអាមេរិក កំពុងស៊ើបអង្កេតលើការគំរាមកំហែងធ្វើឃាតលើលោកប្រធានាធិបតី ដូណាល់ ត្រាំ (Donald Trump) ដោយអតីតនាយក FBI លោក James Comey។

ការប្រកាសរបស់លោកស្រី Noem បានកើតឡើង បន្ទាប់ពីលោក Comey បានធ្វើការបង្ហោះដែលត្រូវបានលុបចោលឥឡូវនេះ នៅលើ Instagram ដែលបង្ហាញរូបភាពនៃលេខ«៨៦ ៤៧» ដែលសរសេរលើរូបសំបកងាវ ដោយលេខ «៨៦» គឺជាពាក្យដែលគេប្រើសម្រាប់ឃាតកម្ម និងលោក ត្រាំ ជាប្រធានាធិបតីទី ៤៧។

លោកស្រី Noem បានបង្ហោះនៅលើបណ្តាញសង្គម Xថា លោក James Comey អតីតនាយក FBI ដែលមានកេរ្តិ៍ឈ្មោះមិនល្អនោះ ទើបតែបានអំពាវនាវឲ្យមានការធ្វើឃាតលោក ត្រាំ ។

លោកស្រី បាននិយាយថា ក្រសួងសន្តិសុខមាតុភូមិ (DHS) និងសេវាសម្ងាត់ កំពុងស៊ើបអង្កេតលើការគំរាមកំហែងនេះ ហើយនឹងឆ្លើយតបយ៉ាងសមរម្យបំផុត»។ ក្រោយមក លោក Comey បាននិយាយនៅលើបណ្តាញសង្គម Instagram ថា លោកបានបង្ហោះ«រូបភាពនៃសំបកងាវមួយចំនួន ដែលខ្ញុំបានឃើញនៅថ្ងៃនេះ នៅលើឆ្នេរសមុទ្រ ដែលខ្ញុំសន្មត់ថា ជាសារនយោបាយ»។

លោកបាននិយាយថា៖«ខ្ញុំមិនបានដឹងថា មនុស្សមួយចំនួន បានភ្ជាប់លេខទាំងនោះ ជាមួយនឹងអំពើហិង្សាទេ។ រឿងនេះ មិនដែលកើតឡើងចំពោះខ្ញុំទេ ប៉ុន្តែខ្ញុំប្រឆាំងនឹងអំពើហិង្សាគ្រប់បែបយ៉ាង ដូច្នេះខ្ញុំបានលុបរូបភាពដែលបានបង្ហោះនោះចោលវិញ»។

គួរបញ្ជាក់ផងដែរថា លោក ត្រាំ បានរងរបួសត្រចៀក អំឡុងពេលប៉ុនប៉ងធ្វើឃាត ដែលបានកើតឡើង ខណៈពេលដែលលោក កំពុងធ្វើការជួបជុំជាមួយក្រុមអ្នកគាំទ្រ នៅទីក្រុង Butler រដ្ឋ Pennsylvania ក្នុងខែកក្កដា ហើយបានប្រឈមនឹងការគំរាមកំហែងផ្សេងទៀត។