មន្ត្រីយោធាជាន់ខ្ពស់របស់ប្រទេសនីហ្សេរីយ៉ាកាលពីថ្ងៃព្រហស្បតិ៍ បានថ្លែងប្រាប់កងទ័ព នៅក្នុងតំបន់ដែលកំពុងប្រយុទ្ធនឹងការកើនឡើងភាពចលាចលរបស់ក្រុមជីហាដថា ការវាយប្រហារទាំងនេះ នឹងត្រូវបានដោះស្រាយយ៉ាងឆាប់រហ័ស។

ក្រុមរដ្ឋឥស្លាមនៅអាហ្វ្រិកខាងលិច និងគូប្រជែងរបស់ខ្លួន ក្រុមបូកូហារ៉ាម ( Boko Haram) បានវាយលុកកាន់តែខ្លាំង លើមូលដ្ឋានយោធាក្នុងប៉ុន្មានសប្តាហ៍ថ្មីៗនេះ ជាពិសេស នៅក្នុងរដ្ឋ Borno ភាគឦសាន ដែលជាចំណុចកណ្តាលនៃការបះបោរ តាំងពីឆ្នាំ ២០០៩។

យោងតាមរបាយការណ៍របស់សារព័ត៌មាន AFP បានឲ្យដឹងថា យ៉ាងហោចណាស់មានមូលដ្ឋានចំនួន ១០ ត្រូវបានវាយប្រហារ ក្នុងរយៈពេលពីរខែ។ មនុស្សយ៉ាងតិច ១០០នាក់ រួមទាំងជនស៊ីវិល ត្រូវបានសម្លាប់ នៅក្នុងការវាយប្រហារ កាលពីខែមេសា។

នាយសេនាធិការការពារជាតិ លោកឧត្តមសេនីយ៍ Christopher Musa បានប្រាប់កងទ័ព នៅក្នុងរដ្ឋធានី Maiduguri របស់រដ្ឋ Borno ថា សកម្មភាព ត្រូវបានធ្វើឡើង ដើម្បីធានាថា យើងដោះស្រាយការវាយប្រហារ ជាបន្តបន្ទាប់ ដោយបញ្ជាក់ថា សម្ភារៈថ្មី កំពុងត្រូវបានបញ្ជូនមកជាបន្តបន្ទាប់។  

លោក Musa បាននិយាយថា ជម្លោះនៅក្នុងរដ្ឋ Sahel រួមទាំងប្រទេសម៉ាលី ឆាដ និងនីហ្សេ «បានធ្វើឲ្យ មានសម្ពាធយ៉ាងខ្លាំងលើប្រទេសនីហ្សេរីយ៉ា ហើយនោះជាមូលហេតុដែលអ្នកឃើញការវាយប្រហារថ្មីៗបានកើតឡើង»។