ប្រធានអាជ្ញាធរប៉ាឡេស្ទីនលោក ម៉ាខ្មូដ អាបាស (Mahmoud Abbas) បាននិយាយនៅក្នុងសុន្ទរកថាទៅកាន់ប្រជាជាតិថា ចំនួនជនភៀសខ្លួនប៉ាឡេស្ទីន និងប្រជាជនដែលត្រូវបានជម្លៀសបច្ចុប្បន្នមានលើសពី ៧ លាននាក់។

លោកបាននិយាយនៅក្នុងឱកាសនៃការប្រារព្ធទិវាណាក់បា ( Nakba) ឬហៅថា ទិវានៃការជម្លៀសប្រជាជនទ្រង់ទ្រាយធំចេញពីទឹកដីកំណើត ដែលជាថ្ងៃបរាជ័យនៅក្នុងសង្គ្រាមអារ៉ាប់-អ៊ីស្រាអែល ឆ្នាំ ១៩៤៨ថា៖«អ្វីដែលកងកម្លាំងកាន់កាប់របស់អ៊ីស្រាអែល បានធ្វើអស់រយៈពេល ១៩ខែ នៅក្នុងទិដ្ឋភាពពេញលេញនៃពិភពលោកទាំងមូល គឺឧក្រិដ្ឋកម្មប្រល័យពូជសាសន៍ ការបំផ្លិចបំផ្លាញ និងការបង្អត់អាហារ ដោយមានគោលបំណងផ្លាស់ទីលំនៅប្រជាជនរបស់យើង ចេញពីតំបន់ហ្កាហ្សាស្ទ្រីប បន្ថែមពីលើឧក្រិដ្ឋកម្មនៃការបន្តលួចទឹកដីនៃរដ្ឋប៉ាឡេស្ទីន នៅក្នុងតំបន់វេសបែង និងទីក្រុងហ្ស៊េរុយសាឡឹមខាងកើត»។ 

លោក អាបាស បាននិយាយនៅក្នុងសេចក្តីថ្លែងការណ៍មួយដែលចេញផ្សាយដោយទីភ្នាក់ងារសារព័ត៌មានWAFA ថា៖«ចំនួនជនភៀសខ្លួនប៉ាឡេស្ទីន នៅខាងក្នុងប៉ាឡេស្ទីន ប្រទេសជិតខាង និងជុំវិញពិភពលោក បានឈានដល់ជនភៀសខ្លួនប៉ាឡេស្ទីនជាង ៧ លាននាក់ ហើយការរងទុក្ខរបស់ពួកគេ នៅតែបន្ត ជាពិសេសនៅក្នុងជំរំជនភៀសខ្លួន នៅតំបន់ហ្កាហ្សា តំបន់វេសបែង រួមទាំងទីក្រុងហ្ស៊េរុយសាឡឹមខាកើត ហ្ស៊កដានី លីបង់ និងស៊ីរី»។