សភានៃប្រទេសលីបង់កាលពីថ្ងៃព្រហស្បតិ៍ បានអនុម័តវិសោធនកម្មច្បាប់ ដែលមានគោលបំណងទប់ស្កាត់ការបាញ់កាំភ្លើង ដោយបង្កើនការពិន័យទ្វេដងសម្រាប់អ្នកដែលបាញ់ទៅលើអាកាស។

ច្បាប់ថ្មីនេះ ដាក់ទណ្ឌកម្មតឹងរ៉ឹងសម្រាប់បុគ្គល ដែលពាក់ព័ន្ធនឹងសកម្មភាពដែលនាំឲ្យមានរបួស និងស្លាប់ជាច្រើន ក្នុងរយៈពេលប៉ុន្មានឆ្នាំចុងក្រោយនេះ ។

វិធានការនេះ កើតឡើង បន្ទាប់ពីទីបញ្ជាការកងទ័ពលីបង់ បានប្រកាសពីការចាប់ខ្លួនមនុស្ស ៨នាក់ ដែលជាផ្នែកមួយនៃកិច្ចខិតខំប្រឹងប្រែង ដើម្បីកំណត់អត្តសញ្ញាណអ្នកដែលបាញ់កាំភ្លើង ក្នុងអំឡុងការបោះឆ្នោ តក្រុង កាលពីថ្ងៃអាទិត្យសប្តាហ៍មុន នៅក្នុងខេត្តភាគខាងជើងលីបង់ និងខេត្ត Akkar។

ដោយមានការគាំទ្រពីនាយកដ្ឋានល្បាតស៊ើបការណ៍ អង្គភាពកងទ័ពបានឆ្មក់ចូលផ្ទះជនសង្ស័យជាច្រើននាក់ និងដកហូតអាវុធ និងគ្រាប់រំសេវ ដែលពួកគេមាន។

ផ្ទៃមេឃនៅពីខាងលើខេត្តភាគខាងជើង និងខេត្ត Akkar ត្រូវបានបំភ្លឺកាលពីយប់ថ្ងៃអាទិត្យមុន ដោយការបាញ់កាំភ្លើង ដើម្បីអបអរជ័យជម្នះរបស់បេក្ខជន នៅក្នុងការបោះឆ្នោតក្រុង ជាកន្លែងដែលគ្រួសារក្នុងតំបន់ប្រកួតប្រជែងជាប្រពៃណីសម្រាប់អាសនៈនៅក្នុងក្រុមប្រឹក្សាក្រុង ដែលគ្រប់គ្រងកិច្ចការរបស់ពួកគេ។