ភ្នំពេញ៖ ថ្លែងក្នុងសន្និសីទសារព័ត៌មានរបស់អង្គភាពអ្នកនាំពាក្យរាជរដ្ឋាភិបាលនាថ្ងៃនេះ ឯកឧត្ដម ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ថ្លែងថា វិស័យសំខាន់ចំនួន៤ ជាចន្ទុលស្តារ និងជំរុញសេដ្ឋកិច្ចកម្ពុជាក្រោយបើកប្រទេសឡើងវិញ។
តាមរយៈសន្និសីទសារព័ត៌មានដែលរៀបចំដោយអង្គភាពអ្នកនាំពាក្យរាជរដ្ឋាភិបាល នៅថ្ងៃទី១៤ ខែធ្នូ ឆ្នាំ២០២១ ស្តីពីការស្តារ និងជំរុញកំណើនសេដ្ឋកិច្ចកម្ពុជាក្នុងការស់ជាមួយជំងឺកូវីដ១៩ តាមគន្លងប្រក្រតីភាពថ្មី ឯកឧត្តម ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ដើម្បីឆ្លើយតបចំពោះការប្រឈមដោយសារវិបត្តិជំងឺកូវីដ១៩ និងក្នុងពេលប្រទេសបើកដំណើរឡើងវិញ ក្រសួងសេដ្ឋកិច្ច និងហិរញ្ញវត្ថុ បានដាក់ចេញក្របខណ្ឌ យុទ្ធ សាស្ត្រ និងកម្មវិធីស្តារ ក៏ដូចជាជំរុញកំណើនសេដ្ឋកិច្ចកម្ពុជា គោលបំណងសំដៅស្តារសេដ្ឋកិច្ច ក្នុងពេលចំពោះមុខ និងរយៈពេលមធ្យមឲ្យត្រឡប់ទៅកំណើនសក្ដានុពល និងពង្រីកភាពធន់សម្រាប់ការអភិវឌ្ឍសង្គម-សេដ្ឋកិច្ច ប្រកបដោយចីរភាព និងបរិយាប័ន្នក្នុងរយៈពេលវែង។
ឯកឧត្ដម ផាន់ ផល្លា បានបញ្ជាក់ថា អំឡុងពេលបើកប្រទេសឡើងវិញ វិស័យសំខាន់ចំនួន៤ ជាចន្ទុលសម្រាប់ស្តារសេដ្ឋកិច្ចកម្ពុជា រួមមាន វិស័យកសិកម្ម កាត់ដេរ ទេសចរណ៍ និងសំណង់។
ជាមួយគ្នានេះ ឯកឧត្តម បានវាយតម្លៃដែរថា រយៈពេល៥-៦ខែចុងក្រោយនេះ វិស័យកាត់ដេររបស់កម្ពុជាមានភាពល្អប្រសើរ ក្រោយកើនឡើងការបង្វិលនៃការបញ្ជាទិញពីប្រទេសដែលឆ្លងជំងឺកូវីដ១៩ខ្លាំងមកកម្ពុជាវិញ រួមជាមួយយុទ្ធសាស្ត្រស្រោច ដោយការចាក់វ៉ាក់សាំងជូន កម្មករ-និយោជិត ដើម្បីទប់ស្កាត់ការរីករាលដាលជំងឺកូវីដ១៩ទទួលបាននូវប្រសិទ្ធខ្ពស់ផងដែរ។
យ៉ាងណាមិញក្រៅពីយុទ្ធសាស្ត្រ និងកម្មវិធីស្តារសេដ្ឋកិច្ចកម្ពុជា ធនាគារពិភពលោក កាលពីថ្ងៃទី០៩ ខែធ្នូ កន្លងទៅ បានឲ្យដឹងថា ក្នុងឆ្នាំ២០២២ កំណើនសេដ្ឋកិច្ចរបស់កម្ពុជា នឹងបន្តកើនឡើងចំនួន ៤.៥%។ ការកើនឡើងនេះ ដោយសារតែវិស័យឧស្សាហកម្ម និងកសិកម្ម ដែលមានតួយ៉ាងសំខាន់ក្នុងការទ្រទ្រង់ដល់យន្តការស្តារសេដ្ឋកិច្ចឱ្យងើបឡើងវិញពីវិបត្តិជំងឺកូវីដ១៩៕ អត្ថបទ៖ ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
