បេសកកម្មគាំទ្ររបស់អង្គការសហប្រជាជាតិនៅប្រទេសលីប៊ី (UNSMIL) កាលពីថ្ងៃព្រហស្បតិ៍ បានអំពាវនាវឱ្យក្រុមប្រដាប់អាវុធដកកម្លាំងចេញភ្លាមៗពីរដ្ឋធានីទ្រីប៉ូលីរបស់ប្រទេសលីប៊ី ហើយត្រឡប់ទៅកាន់បន្ទាយរបស់ខ្លួនវិញ បន្ទាប់ពីការប៉ះទង្គិចគ្នាដោយហិង្សារយៈពេលពីរថ្ងៃ បណ្តាលឱ្យមនុស្សយ៉ាងហោចណាស់៦នាក់ស្លាប់។

បេសកកម្មគាំទ្ររបស់អង្គការសហប្រជាជាតិនៅប្រទេសលីប៊ី (UNSMIL) បាននិយាយនៅក្នុងសេចក្តីថ្លែងការណ៍ថា បេសកកម្មនេះ មានការតក់ស្លុតយ៉ាងខ្លាំងចំពោះរបាយការណ៍នៃគ្រាប់រំសេវដែលត្រូវបានប្រើប្រាស់ទៅលើក្រុមបាតុករនៅទីក្រុងទ្រីប៉ូលី ដែលបានចេញធ្វើបាតុកម្មកាលពីពេលយប់ ដោយបាននិយាយថា បេសកកម្មកំពុង «តាមដានយ៉ាងដិតដល់នូវបទឈប់បាញ់ដ៏ផុយស្រួយ» នៅក្នុងរដ្ឋធានី។ បេសកកម្មរបស់អង្គការសហប្រជាជាតិ និយាយថា ខ្លួនកំពុងចូលរួមជាមួយក្រុមអ្នកសម្របសម្រួល និងកំពុងធ្វើការលើការចាប់ផ្តើមយន្តការដើម្បីគាំទ្រនិងទទួលបាននិរន្តរភាពបទឈប់បាញ់នាពេលបច្ចុប្បន្ន។

ការប៉ះទង្គិចគ្នាដោយហិង្សា បានផ្ទុះឡើងនៅទីក្រុងទ្រីប៉ូលី រវាងកងកម្លាំងដែលស្មោះត្រង់នឹងនាយករដ្ឋមន្ត្រី លោក Abdul-Hamed Dbeibah និងក្រុមគាំទ្រស្ថិរភាព SSA ជាក្រុមសកម្មប្រយុទ្ធដ៏មានឥទ្ធិពល ក្នុងពេលមានរបាយការណ៍អំពីការស្លាប់របស់លោក Abdul Ghani al-Kikli ដែលត្រូវបានគេស្គាល់ថា Ghaniwa ជាមេដឹកនាំក្រុម SSA ។

កាលពីថ្ងៃពុធសប្តាហ៍នេះ រដ្ឋាភិបាលរួបរួមជាតិដែលមានមូលដ្ឋាននៅទីក្រុងទ្រីប៉ូលីរបស់ប្រទេសលីប៊ីបានប្រកាសបទឈប់បាញ់ បន្ទាប់ពីការប៉ះទង្គិចគ្នារវាងក្រុមជីវពលជាគូប្រជែងដែលបានរាលដាលចូលទៅក្នុងសង្កាត់ភាគកណ្តាល និងតំបន់លំនៅឋាននៃរដ្ឋធានី ហើយកាលពីថ្ងៃព្រហស្បតិ៍ ក្រសួងមហាផ្ទៃបាននិយាយថា ស្ថានភាពសន្តិសុខក្នុងទីក្រុងទ្រីប៉ូលី មានស្ថិរភាព។