អ្នកជំនួញធំផ្នែកសំណង់ម្នាក់ និងមនុស្សជាង ១០នាក់ផ្សេងទៀត បានប្រគល់ខ្លួនជូននគរបាល នៅថ្ងៃសុក្រ (១៦ ឧសភា) នេះ ជុំវិញការចោទប្រកាន់បទល្មើសព្រហ្មទណ្ឌ ពីបទធ្វេសប្រហែស ពាក់ព័ន្ធនឹងហេតុការណ៍បាក់រលំអគារខ្ពស់ នៅទីក្រុងបាងកក អំឡុងពេលមានរញ្ជួយដី កាលពីថ្ងៃទី២៨ ខែមីនា។

ស្នងការនគរបាលរងរបស់ទីក្រុងបាងកក លោក Noppasin Poonsawat បានប្រាប់ឲ្យដឹងថា លោក Premchai Karnasuta ប្រធានក្រុមហ៊ុន Italian-Thai Development Co ដែលជាអ្នកម៉ៅការធំរបស់ថៃ សម្រាប់គម្រោងសាងសង់ ព្រមទាំងអ្នករៀបចំប្លង់ផ្សេងៗ និងវិស្វករ ស្ថិតក្នុងចំណោមមនុស្ស ១៧នាក់ដែលត្រូវបានចោទប្រកាន់ពីបទល្មើសព្រហ្មទណ្ឌ ជុំវិញការធ្វេសប្រហែសវិជ្ជាជីវៈ ដែលបណ្តាលឲ្យមានអ្នកស្លាប់។ ជនជាប់ចោទបានបដិសេធជាសាធារណៈថា ខ្លួនមិនបានប្រព្រឹត្តខុសឡើយ។

គួរបញ្ជាក់ថា មនុស្សចំនួន ៩២នាក់ ត្រូវបានគេបញ្ជាក់ថា ស្លាប់នៅក្រោមគំនរបាក់បែកនៃអគារដែលបាន និងកំពុងស្ថិតក្រោមការសាងសង់ ហើយមនុស្សមួយចំនួនតូចផ្សេងទៀតនៅតែមិនទាន់រកឃើញនៅឡើយ។ អគារដែលនឹងក្លាយជាការិយាល័យសវនកម្មរដ្ឋថ្មី គឺជាអគារតែមួយគត់នៅប្រទេសថៃ ដែលបានបាក់រលំ អំឡុងពេលមានរញ្ជួយដីដែលបានកើតមាននៅភាគកណ្តាលប្រទេសជិតខាងមីយ៉ាន់ម៉ា។

លោក Noppasin បាននិយាយនៅឯសន្និសីទសារព័ត៌មានថា ភស្តុតាង និងសក្ខីកម្មពីអ្នកជំនាញ បានបង្ហាញថា ផែនការសាងសង់មិនស្របតាមស្តង់ដារ និងច្បាប់កំណត់៕