អ្នកវិភាគ និងវិនិយោគិន បាននិយាយថា អត្រាពន្ធគយរបស់ប្រធានាធិបតីអាមេរិក លោក Donald Trump លើប្រទេសចិន ទំនងជានឹងនៅតែស្ថិតក្នុងកម្រិតមួយដែលត្រូវបានគេរំពឹងថា នឹងកាត់បន្ថយយ៉ាងខ្លាំងនូវការនាំចេញរបស់ចិនទៅកាន់សហរដ្ឋអាមេរិក បន្ទាប់ពីមានការផ្អាកសង្គ្រាមពាណិជ្ជកម្មរយៈពេល ៩០ថ្ងៃ ដោយពួកគេបានលើកឡើងថា ទីក្រុងប៉េកាំងអាចត្រូវស៊ូទ្រាំនឹងភាពលំបាកផ្នែកសេដ្ឋកិច្ចបន្ថែមទៀត ទោះបីជាមានការចរចាយ៉ាងសកម្មក៏ដោយ។

យោងតាមការស្ទង់មតិរបស់សារព័ត៌មាន Bloomberg បានឲ្យដឹងថា ការតព្វកិច្ចពន្ធរបស់សហរដ្ឋអាមេរិកលើផលិតផលចិនដែលដាក់នៅឆ្នាំនេះ ទំនងជានឹងបន្តរក្សាជាមួយកម្រិត ៣០ភាគរយ រហូតដល់ចុងឆ្នាំ២០២៥។

ការព្យាកររបស់សារព័ត៌មាន Bloomberg Economics បានបង្ហាញថា បើទោះបីជាកម្រិត គឺទាបជាងមុនមានការផ្សះផ្សាគ្នាក្នុងសប្តាហ៍នេះក៏ដោយ ក៏អត្រានាពេលនេះនេះ គឺខ្ពស់គ្រប់គ្រាន់ ក្នុងការធ្វើឲ្យបាត់ទំហំ ៧០ភាគរយនៃការនាំចេញរបស់ចិនទៅកាន់ប្រទេសដែលមានសេដ្ឋកិច្ចធំបំផុតរបស់ពិភពលោក ក្នុងរយៈពេលមធ្យម។

លទ្ធផលនៃការស្ទង់មតិដែលត្រូវបានធ្វើឡើងចន្លោះថ្ងៃទី១៤ ខែឧសភា និងទី១៥ ខែឧសភា ដោយមានអ្នកឆ្លើយសំណួរចំនួន ២២នាក់នោះ បង្ហាញពីការរំពឹងទុកទាប សម្រាប់ការចរចាពាណិជ្ជកម្ម ដើម្បីលុបចោលនូវកាតព្វកិច្ចពន្ធដែលលោក Trump ដាក់លើប្រទេសចិនយ៉ាងឆាប់រហ័ស អំឡុងអាណត្តិទី២ របស់លោក។ ហើយយោងតាមការស្ទង់មតិដាច់ដោយឡែកមួយបានឲ្យដឹងថា ទិន្នន័យផ្លូវការដែលផុតកំណត់នៅថ្ងៃទី១៩ ខែឧសភា ត្រូវបានគេព្យាករថា នឹងបង្ហាញពីការធ្លាក់ចុះនៃទិន្នផលឧស្សាហកម្មរបស់ប្រទេសចិន នៅក្នុងខែមេសា ដោយសារការគំរាមកំហែងពន្ធមានទម្ងន់លើការនាំចេញ។

សេដ្ឋវិទូ នៅធនាគារ DNB គឺលោកស្រី Kelly Chen បាននិយាយថា៖ «យើងរំពឹងថា ការចរចាពាណិជ្ជកម្មនឹងបញ្ចប់ទៅជាមួយនឹងកិច្ចព្រមព្រៀងកម្រិតទាប»។ លោកស្រីបានបន្ថែមថា៖ «មិនមានពេលវេលាគ្រប់គ្រាន់ ដើម្បីអាចឲ្យសហរដ្ឋអាមេរិក និងចិនផ្លាស់ប្តូរគោលនយោបាយគ្នាប្រាកដប្រជា នៅមុនការបោះឆ្នោតពាក់កណ្តាលអាណត្តិរបស់សហរដ្ឋអាមេរិកឆ្នាំ២០២៦ ដែលនឹងធ្វើជាពេលវេលាកំណត់ សម្រាប់កិច្ចព្រមព្រៀង»៕