ការមានកិច្ចព្រមព្រៀងបញ្ញាសិប្បនិម្មិត (AI) យ៉ាងឆាប់រហ័សជាបន្តបន្ទាប់របស់ប្រធានាធិបតីអាមេរិក លោក Donald Trump អំឡុងដំណើរទស្សនកិច្ចរបស់លោក នៅតំបន់មជ្ឈិមបូព៌ា កំពុងបើកឲ្យមានការប្រេះឆា នៅក្នុងរដ្ឋបាលផ្ទាល់ខ្លួនរបស់លោក ដោយសារអ្នកនយោបាយផ្ដោតលើការរឹតបន្តឹងលើប្រទេសចិន បារម្ភកាន់តែខ្លាំងឡើងៗ ដែលថា គម្រោងនានាកំពុងធ្វើឲ្យសន្តិសុខជាតិ និងផលប្រយោជន៍សេដ្ឋកិច្ចរបស់សហរដ្ឋអាមេរិកស្ថិតក្នុងហានិភ័យ។

គួរបញ្ជាក់ថា ក្រុមការងាររបស់លោក Trump បានចុះកិច្ចព្រមព្រៀង ដែលនឹងអាចឲ្យភាគីនានា នៅប្រទេសអារ៉ាប៊ីសាអ៊ូឌីត ទទួលបានបន្ទះឈីបរាប់ម៉ឺនគ្រឿងពីក្រុមហ៊ុន Nvidia Corp. និង Advanced Micro Devices Inc. (AMD) ខណៈដែលការនាំចេញទៅកាន់ប្រទេសអារ៉ាប់រួម អាចបង្កើនល្បឿនលើស ១លានគ្រឿង ដែលភាគច្រើនសម្រាប់គម្រោងពាក់ព័ន្ធ ឬគ្រប់គ្រងដោយក្រុមហ៊ុនអាមេរិក។

បន្ទះឈីបបែបនេះត្រូវបានប្រើដើម្បីអភិវឌ្ឍ និងបណ្តុះបណ្តាលគំរូដែលអាចធ្វើត្រាប់តាមបញ្ញារបស់មនុស្ស ហើយវាគឺជាបច្ចេកវិទ្យាដែលគេចង់បានបំផុតនៃយុគសម័យ AI សព្វថ្ងៃនេះ។

តែយ៉ាងណាក្ដី បើយោងតាមបុគ្គលដែលដឹងពីបញ្ហានេះ បានបង្ហើបថា មន្ត្រីជាន់ខ្ពស់មួយចំនួនរបស់រដ្ឋបាលនេះ កំពុងប្រឹងប្រែងបន្ថយកម្រិតនៃកិច្ចព្រមព្រៀង ដោយសារព្រួយបារម្ភថា សហរដ្ឋអាមេរិកមិនបានដាក់របាំងការពារគ្រប់គ្រាន់នោះឡើយ ដើម្បីការពារបន្ទះឈីបរបស់អាមេរិកដែលបានដឹកជញ្ជូនទៅកាន់រដ្ឋឈូងសមុទ្រកុំឲ្យផ្តល់ផលប្រយោជន៍ដល់ប្រទេសចិន ដែលមានទំនាក់ទំនងយ៉ាងស៊ីជម្រៅនៅក្នុងតំបន់នេះ៕