ភ្នំពេញ៖ រាជរដ្ឋាភិបាល បានដាក់ចេញនូវកម្មវិធីជំនួយសង្គម ដើម្បីជួយសម្រួលការ លំបាកផ្នែកជីវភាពប្រជាពលរដ្ឋ ស្រី្ដមានផ្ទៃពោះ កុមារក្រោម២ និងគ្រួសារអ្នកឆ្លង និងស្លាប់ដោយដារជំងឺកូវីដ១៩ ក្នុងស្ថានភាពនៃការរីករាលដាលជំងឺកូវីដ-១៩។
ការប្រកាសដាក់ឱ្យអនុវត្តកម្មវិធីឧបត្ថម្ភសាច់ប្រាក់ ដែលមកដល់ពេលនេះ រដ្ឋាភិបាលបានឧបត្ថម្ភថវិកា៤៨៤,៧លានដុល្លារ និង៣២ពាន់រៀល។
ឯកឧត្ដម វង សូត រដ្ឋមន្ដ្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាជាតិកម្ពុជាដើម្បីកុមារ បានថ្លែងលើកឡើងនៅក្នុងកិច្ចប្រជុំប្រចាំឆ្នាំរបស់ក្រុមប្រឹក្សាជាតិកម្ពុជាដើម្បីកុមារ ដែលធ្វើឡើងនៅខេត្ដសៀមរាប នាថ្ងៃទី១៤ ខែធ្នូ ឆ្នាំ២០២១នេះ។
ឯកឧត្ដមមានប្រសាសន៍ថា រាជរដ្ឋាភិបាលបានដាក់ចេញនូវកម្មវិធីជំនួយសង្គម ក្នុងគោលដៅជួយសម្រួលការ លំបាកផ្នែកជីវភាពក្នុងស្ថានភាព នៃការរីករាលដាលជំងឺកូវីដ-១៩ ក៏ដូចជា ការគិតគូរពីសុខទុក្ខប្រជាជន ពិសេសកុមារ និងប្រជាជនក្រីក្រក្នុងការ ដោះស្រាយបញ្ហាប្រឈមនានា តាមរយៈកម្មវិធីឧបត្ថម្ភសាច់ប្រាក់ចំនួន០៣ រួមមាន កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុ ក្រោម២ឆ្នាំ ដែលបានអនុវត្តក្នុងខែមិថុនា ឆ្នាំ២០១៩ មកទល់ពេលនេះ ស្ត្រីមានផ្ទៃពោះនិងកុមារប្រមាណជាង ២៤ម៉ឺននាក់ បានទទួលសេវានេះ និងបានចំណាយថវិការដ្ឋសរុបប្រមាណ ១៤,៧លានដុល្លារអាមេរិក។
កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ បានប្រកាសដាក់ឱ្យអនុវត្តនៅថ្ងៃ ទី២៤ ខែមិថុនា ឆ្នាំ២០២០ មកទល់ពេលនេះ មានអ្នកទទួលផលជាង៧៤ម៉ឺនគ្រួសារ ដោយចំណាយអស់ថវិការដ្ឋសរុបជាង ១៨៨៣ប៊ីលានរៀល ស្មើនឹងប្រមាណ៤៧០លានដុល្លារអាមេរិក។ដោយឡែកកម្មវិធីជំនួយសង្គមជាសាច់ប្រាក់ក្រោយពេលបិទខ្ទប់សម្រាប់ប្រជាពលរដ្ឋ និងគ្រួសារប្រជាពលរដ្ឋមានការលំបាកផ្នែកជីវភាព និងគ្រួសារប្រជាពលរដ្ឋដែលមានអ្នកឆ្លង និងស្លាប់ដោយជំងឺកូវីដ-១៩ ដោយបានចំណាយថវិកាសរុបចំនួន ៣២ពាន់លានរៀល។
ឯកឧត្ដម វង សូត បានឱ្យដឹងទៀតថា រាជរដ្ឋាភិបាល ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើឲ្យប្រទេសជាតិទទួលបានសុខសន្តិភាព ប្រជាជនមានសិទ្ធិសេរីភាពពេញ បរិបូរណ៍ ហើយពីមួយថ្ងៃទៅមួយថ្ងៃការរស់នៅរបស់ប្រជាជន កាន់តែមានភាពប្រសើរឡើងជាលំដាប់។
ប៉ុន្ដែយ៉ាងនេះក្ដី ឯកឧត្ដមបញ្ជាក់ថា នៅមានកុមារមួយចំនួនកំពុងរស់នៅក្នុងស្ថានភាពលំបាក រងគ្រោះ ដែលត្រូវការការគាំទ្រ និងអន្តរាគមន៍ បន្ថែមទៀតជាចាំបាច់។បច្ចុប្បន្ន ការអន្តរាគមន៍ចំពោះកុមាររងគ្រោះ របស់ យើងនៅមានលក្ខណៈដាច់ដោយដុំ មិនទាន់មានក្របខ័ណ្ឌការងារ និង ប្រព័ន្ធគ្រប់គ្រងច្បាស់លាស់នៅឡើយ ដែលទាមទារធ្វើការកែលម្អ និងបន្ស៊ី គ្នាដើម្បីឱ្យក្លាយជាយន្តការគ្រប់គ្រងច្បាស់លាស់ សំដៅផ្លាស់ប្តូរព័ត៌មាន និងមានវិធានការទាន់ពេលវេលា សមស្របតាមគោលនយោបាយជាតិ ស្តីពីប្រព័ន្ធកិច្ចការពារកុមារដែលបានគ្រោងទុក។
សូមជម្រាបថា កម្ពុជាបានផ្តល់សច្ចាប័នលើអនុសញ្ញា ស្តីពីសិទ្ធិកុមារ នៅឆ្នាំ១៩៩២មក រាជរដ្ឋាភិបាលបានបង្កើតគោលនយោបាយ ច្បាប់ ផែនការ យុទ្ធសាស្ត្រ ផែនការសកម្មភាពជាតិ យន្តការថ្នាក់ជាតិ និងក្រោមជាតិជាច្រើន ដើម្បីសម្របសម្រួល និងពិនិត្យតាមដានវឌ្ឍនភាព និងបញ្ហាប្រឈមទៅ លើកុមារ ដើម្បីធានាថាកុមារត្រូវបានការពារដោយច្បាប់ និងលិខិតបទដ្ឋាន គតិយុត្តនានាដែលបាននិងកំពុងអនុវត្តជាធរមាន។ ជាមួយគ្នានេះដែរ រាជរដ្ឋាភិបាលបានដាក់ចេញនូវគោលនយោបាយជាតិ ស្តីពីប្រព័ន្ធកិច្ចការពារកុមារ ដោយផ្តោតលើសសរស្តម្ភជាយុទ្ធសាស្ត្រសំខាន់ៗចំនួន៣ គឺការបង្ការទប់ស្កាត់ ការអន្តរាគមន៍ ការផ្ដល់សេវាឆ្លើយតប ដែលសសរស្ដម្ភនីមួយៗសម្រាប់ក្រសួង ស្ថាប័នពាក់ព័ន្ធ ដែលបំពេញការងារក្នុងការលើកកម្ពស់សិទ្ធិកុមារ យកទៅអនុវត្តប្រកបដោយប្រសិទ្ធភាព និងទទួលបានជោគជ័យ ឆ្លើយតបនឹងការប្ដេជ្ញាចិត្តរបស់រាជរដ្ឋាភិបាលក្នុងការអនុវត្តកិច្ចការពារកុមារដែលមានលក្ខណៈជាប្រព័ន្ធនៅកម្ពុជា៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
