អ្នកចរចាពីភាគីរុស្ស៊ី និងអ៊ុយក្រែន បានស្ថិតនៅក្នុងទីក្រុងអ៊ីស្តង់ប៊ុល ប្រទេសទួរគី នៅថ្ងៃសុក្រ (ទី១៦ ខែឧសភា) នេះ ជាអ្វីដែលត្រូវបានចាត់ទុកថា ជាកិច្ចចរចាសន្តិភាពដោយផ្ទាល់លើកដំបូងរបស់ប្រទេសទាំង២ ក្នុងរយៈពេលជាង ៣ឆ្នាំ ដែលត្រូវបានជំរុញដោយសម្ពាធពីប្រធានាធិបតីអាមេរិក លោក Donald Trump ដើម្បីឲ្យបញ្ចប់ជម្លោះដ៏អាក្រក់បំផុតរបស់អឺរ៉ុប គិតចាប់តាំងពីសង្គ្រាមលោកលើកទី២។

ការជួបគ្នាដែលត្រូវបានរំពឹងទុក ក្នុងវិមាន Dolmabahce នៅទីក្រុងឆ្នេរ Bosphorus នឹងក្លាយជាសញ្ញានៃវឌ្ឍនភាពការទូត រវាងភាគីសង្រ្គាម ដែលមិនបានជួបប្រជុំគ្នាដោយផ្ទាល់ គិតតាំងពីខែមីនា ឆ្នាំ២០២២ ដែលជាខែបន្ទាប់ពីមានការលុកលុយរបស់រុស្ស៊ីលើអ៊ុយក្រែន។

ការរំពឹងទុកពីការទម្លាយភាពទាល់ច្រកដែលមានកម្រិតទាបរួចហើយនោះ ត្រូវបានប៉ះពាល់បន្ថែមទៀត កាលពីថ្ងៃព្រហស្បតិ៍ (ទី១៥ ខែឧសភា) នៅពេលដែលលោក Trump បាននិយាយថា នឹងមិនមានការវិវត្តណាមួយឡើយ ប្រសិនបើគ្មានជំនួប រវាងលោក និងប្រធានាធិបតីរុស្ស៊ី លោក Vladimir Putin។

លោក Trump ដែលកំពុងបញ្ចប់ដំណើរទស្សនកិច្ច នៅតំបន់មជ្ឈិមបូព៌ា និងធ្វើដំណើរត្រលប់ទៅទីក្រុងវ៉ាស៊ីនតោនវិញ បាននិយាយនៅថ្ងៃសុក្រនេះថា លោកនឹងជួបមេដឹកនាំរុស្ស៊ី «ឲ្យបានឆាប់តាមដែលអា

លោក Putin កាលពីថ្ងៃអាទិត្យចុងសប្ដាហ៍កន្លងមក បានស្នើឲ្យមានកិច្ចពិភាក្សាដោយផ្ទាល់ជាមួយអ៊ុយក្រែន នៅប្រទេសទួរគី ប៉ុន្តែបានបដិសេធការជំរុញពីប្រធានាធិបតីអ៊ុយក្រែន លោក Volodymyr Zelensky ដែលចង់ឲ្យជួបរូបលោកដោយផ្ទាល់ ហើយជំនួសមកវិញ បានបញ្ជូនក្រុមមន្ត្រីថ្នាក់កណ្តាលទៅកាន់កិច្ចពិភាក្សានេះ។

លោក Zelenskiy បាននិយាយថា ការសម្រេចចិត្តរបស់លោក Putin មិនចូលរួម ប៉ុន្តែបញ្ជូននូវអ្វីដែលលោកហៅថា ជាក្រុម «តុបតែងឲ្យល្អមើល» បង្ហាញថា មេដឹកនាំរុស្ស៊ីមិនយកចិត្តទុកដាក់ ចំពោះការបញ្ចប់សង្រ្គាមនោះទេ។ រុស្ស៊ីបានចោទអ៊ុយក្រែនថា បានព្យាយាម «ទាក់ទាញការចាប់អារម្មណ៍» ជុំវិញការចរចានេះ។

រដ្ឋមន្ត្រីការបរទេសអាមេរិក លោក Marco Rubio ដែលបានធ្វើដំណើរទៅទីក្រុងអ៊ីស្តង់ប៊ុល នៅថ្ងៃសុក្រនេះ បានប្រាប់អ្នកសារព័ត៌មាននៅយប់មុននោះថា ដោយផ្អែកលើកម្រិតនៃក្រុមចរចា ការទម្លាយភាពទាល់ច្រកដ៏ធំណាមួយ ទំនងជាមិនអាចទៅរួចនោះទេ៕