អនុរដ្ឋមន្ត្រីការបរទេសអ៊ីរ៉ង់ បាននិយាយថា អ្នកការទូតមកពីប្រទេសអ៊ីរ៉ង់ និងប្រទេសអឺរ៉ុបចំនួន ៣ បានជួបពិភាក្សាគ្នា អំពីកិច្ចព្រមព្រៀងនុយក្លេអ៊ែរឆ្នាំ២០១៥ របស់ពួកគេ នៅក្នុងទីក្រុងអ៊ីស្តង់ប៊ុល ប្រទេសទួរគី នៅថ្ងៃសុក្រ (ទី១៦ ខែឧសភា) នេះ។

កិច្ចពិភាក្សា រវាងអ្នកការទូតជាន់ខ្ពស់មកពីអ៊ីរ៉ង់ និងប្រទេសអឺរ៉ុបចំនួន៣ គឺអង់គ្លេស បារាំង និងអាល្លឺម៉ង់ ដែលត្រូវបានគេស្គាល់ថា E3 បានកើតឡើងមុនពេលការចរចារជុំទី៥ ដែលត្រូវបានរំពឹងទុក រវាងសហរដ្ឋអាមេរិក និងអ៊ីរ៉ង់។

ក្រោមលក្ខខណ្ឌនៃសេចក្ដីសម្រេចរបស់អង្គការសហប្រជាជាតិ (UN) ដែលផ្តល់សច្ចាប័នដល់កតិកាសញ្ញានុយក្លេអ៊ែរឆ្នាំ២០១៥ មហាអំណាចអឺរ៉ុបទាំង៣ អាចដាក់ទណ្ឌកម្មឡើងវិញរបស់ UN ប្រឆាំងនឹងទីក្រុងតេអេរ៉ង់ ដែលត្រូវបានគេស្គាល់នៅក្នុងរង្វង់ការទូតថា ជា «ការមានយន្តការឡើងវិញយ៉ាងឆាប់រហ័ស» ប្រសិនបើគ្មានកិច្ចព្រមព្រៀងណាមួយត្រូវបានសម្រេច ជុំវិញកម្មវិធីនុយក្លេអ៊ែររបស់អ៊ីរ៉ង់។

យោងតាមអ្នកការទូត និងឯកសារដែលត្រូវបានឃើញដោយសារព័ត៌មាន Reuters បានឲ្យដឹងថា បណ្តាប្រទេស E3 អាចនឹងបង្កឲ្យមានយន្តការនោះ នៅខែសីហា ប្រសិនបើគ្មានកិច្ចព្រមព្រៀងសំខាន់ៗ អាចត្រូវបានរកឃើញនៅពេលនោះទេ។ ឱកាសចុងក្រោយចាត់វិធានការនោះ គឺនៅថ្ងៃទី១៨ ខែតុលា។

តែយ៉ាងណាក្ដី តាមរយៈការបង្ហោះលើបណ្ដាញសង្គម X នៅថ្ងៃសុក្រនេះ អនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi បានឲ្យដឹងថា ប្រទេសអ៊ីរ៉ង់ និងអឺរ៉ុប បានយល់ព្រមធ្វើកិច្ចចរចាបន្ថែមទៀតប្រសិនបើចាំបាច់៕