កងកម្លាំងរក្សាសន្តិភាពអង្គការសហប្រជាជាតិ (UN) បានប្រាប់ឲ្យដឹងថា ជនស៊ីវិលមួយក្រុមធំដែលមានដំបងដែក និងពូថៅ បានវាយប្រហារលើកងទ័ព UN អំឡុងពេលល្បាត នៅភាគខាងត្បូងប្រទេសលីបង់ នៅថ្ងៃសុក្រ (ទី១៦ ខែឧសភា) នេះ បណ្តាលឱ្យខូចខាតយានយន្តរបស់អង្គការសហប្រជាជាតិ ប៉ុន្តែមិនមានអ្នករងរបួសនោះទេ។

យោងតាមកងកម្លាំងបណ្តោះអាសន្នរបស់អង្គការសហប្រជាជាតិ នៅប្រទេសលីបង់ (UNIFIL) បានឲ្យដឹងថា កងទ័ពរបស់ UN បានប្រើប្រាស់កម្លាំងមិនបង្កគ្រោះថ្នាក់ដល់ជីវិត ដើម្បីការពារខ្លួន និងអ្នកដែលមានវត្តមាន ដោយបន្ថែមថា ការល្បាតបានធ្វើឡើងជាប្រចាំ រវាងភូមិ Jmayjmeh និង Khirbat Silim។

កងកម្លាំងប្រដាប់អាវុធលីបង់ (LAF) ត្រូវបានជូនដំណឹង និងទៅដល់ភ្លាមៗ បន្ទាប់ពីមានហេតុការណ៍នោះ ដោយបានអមដំណើរក្រុមល្បាតត្រលប់ទៅមូលដ្ឋានវិញ។ UNIFIL បានប្រាប់ថា ការល្បាតត្រូវបានគ្រោងទុកជាមុន និងសម្របសម្រួលជាមួយ LAF។

បេសកកម្មរក្សាសន្តិភាពរបស់អង្គការសហប្រជាជាតិ បានសង្កត់ធ្ងន់ថា អាណត្តិរបស់ខ្លួន ក្រោមសេចក្ដីសម្រេច ១៧០១ របស់ក្រុមប្រឹក្សាសន្តិសុខអង្គការសហប្រជាជាតិ ធានានូវសេរីភាពនៃការធ្វើដំណើរនៅក្នុងតំបន់នៃប្រតិបត្តិការរបស់ខ្លួន ដោយមាន ឬគ្មាន LAF អមដំណើរ៕