អ៊ីស្រាអែល បានវាយប្រហារលើកំពង់ផែHodeidah និងកំពង់ផែSalif សមុទ្រក្រហម នៅប្រទេសយេម៉ែនកាលពីថ្ងៃសុក្រ ទី១៦ ឧសភា ដោយកំពុងបន្តយុទ្ធនាការរបស់ខ្លួនដើម្បីបំផ្លាញសមត្ថភាពយោធា របស់ក្រុមហ៊ួទី និងបានព្រមានថាមេដឹកនាំជាន់ខ្ពស់របស់ក្រុមនេះ អាចត្រូវបានកំណត់គោលដៅ ប្រសិនបើការវាយប្រហារលើអ៊ីស្រាអែល នៅតែបន្ត។

ក្រុមហ៊ួទី បានបន្តបាញ់មីស៊ីលទៅកាន់ប្រទេសអ៊ីស្រាអែល ជាអ្វីដែលពួកគេនិយាយថា ក្នុងសាមគ្គីភាពជាមួយពលរដ្ឋប៉ាឡេស្ទីននៅតំបន់ហ្កាហ្សាទោះបីជាពួកគេបានព្រមព្រៀងបញ្ឈប់ការវាយប្រហារលើនាវារបស់សហរដ្ឋអាមេរិកក៏ដោយ។

អ៊ីស្រាអែល បានធ្វើការវាយប្រហារសងសឹកជាការឆ្លើយតប រួមទាំងការវាយប្រហារមួយលើកកាលពីថ្ងៃទី៦ ខែឧសភា ដែលបានបំផ្លាញអាកាសយានដ្ឋានធំរបស់ប្រទេសយេម៉ែនក្នុងទីក្រុងសាណា និងបានសម្លាប់មនុស្សជាច្រើននាក់។

កាលពីថ្ងៃសុក្រ យោធាអ៊ីស្រាអែលបាននិយាយថា ខ្លួនបានទម្លាក់គ្រាប់បែកជាង៣០គ្រាប់ទៅលើគោលដៅរបស់ក្រុមហ៊ួរទី ក្នុងការវាយប្រហារលើកទី៨របស់ខ្លួន។ យោធានិយាយថា កំពង់ផែ Hodeidah និង Salif ត្រូវបានប្រើប្រាស់ដើម្បីផ្ទេរសព្វាវុធ និងបាននិយាយឡើងវិញនូវការព្រមានរបស់ខ្លួនដល់ប្រជាជនក្នុងតំបន់ទាំងនោះឱ្យជម្លៀសខ្លួនចេញ។ នាយករដ្ឋមន្ត្រីអ៊ីស្រាអែល លោក Benjamin Netanyahu និងរដ្ឋមន្ត្រីការពារជាតិលោក Israel Katz បាននិយាយនៅក្នុងសេចក្តីថ្លែងការណ៍រួមថា ពួកគេនឹងតាមប្រមាញ់មេដឹកនាំកំពូលរបស់ក្រុមហ៊ួរទី លោក Abdul Malik al-Houthi ។

លោក Netanyahu និងលោក Israel Katz និយាយថា «ប្រសិនបើក្រុមហ៊ួរទី បន្តបាញ់មីស៊ីលទៅកាន់រដ្ឋអ៊ីស្រាអែល ពួកគេនឹងទទួលគ្រោះយ៉ាងធ្ងន់ធ្ងរ ហើយយើងក៏នឹងធ្វើឱ្យមេដឹកនាំរងគ្រោះផងដែរ»។