ក្រុមអ្នកតវ៉ានៅប្រទេសលីប៊ីរាប់រយនាក់ បានអំពាវនាវកាលពីថ្ងៃសុក្រ ទី១៦ ខែឧសភា ឱ្យបណ្តេញចេញពីតំណែងនាយករដ្ឋមន្ត្រី លោក Abdulhamid Dbeibah ដែលត្រូវបានទទួលស្គាល់ជាអន្តរជាតិ ហើយយ៉ាងហោចណាស់រដ្ឋមន្ត្រីបីរូប បានលាចេញពីតំណែងដោយគាំទ្រដល់ក្រុមបាតុករ។

ក្រុមបាតុករ បានមកប្រមូលផ្តុំគ្នានៅទីលានមួយកន្លែងក្នុងទីក្រុងទ្រីប៉ូលី ដោយស្រែកពាក្យស្លោកដូចជា «ប្រទេសចង់ផ្តួលរំលំរដ្ឋាភិបាល» និង «យើងចង់បានការបោះឆ្នោត»។ ក្រោយមក ពួកគេដើរហែរក្បួនទៅកាន់អគាររដ្ឋាភិបាលនៅកណ្តាលទីក្រុង។ អ្នកតវ៉ាម្នាក់បាននិយាយថា «យើងនឹងមិនចាកចេញទេរហូតដល់នាយករដ្ឋមន្ត្រីចាកចេញពីតំណែង។

អ្នកតវ៉ាបានកាន់រូបថត លោកនាយករដ្ឋមន្ត្រី Dbeibah លោកIbrahim Dbeibah ទីប្រឹក្សាសន្តិសុខជាតិ និងរដ្ឋមន្ត្រីក្រសួងមហាផ្ទៃ លោក Emad Tarbulsi ដោយមុខរបស់អ្នកទាំងបីត្រូវបានគូសខ្វែងពណ៌ក្រហម។

លោក Dbeibah បានដឹកនាំរដ្ឋាភិបាលរួបរួមជាតិរបស់ប្រទេសដែលខ្វែងគំនិតគ្នា បានឡើងកាន់អំណាចតាមរយៈដំណើរការគាំទ្រដោយអង្គការសហប្រជាជាតិនៅឆ្នាំ ២០២១។ ការបោះឆ្នោត ដែលបានគ្រោងទុក បានបរាជ័យក្នុងការដំណើរការនៅឆ្នាំនោះ ដោយសារតែការមិនចុះសម្រុងគ្នាក្នុងចំណោមភាគីជាគូប្រជែង ហើយលោកនៅតែកាន់អំណាច។