នគរបាល បាននិយាយនៅថ្ងៃសៅរ៍នេះថា នគរបាលអង់គ្លេស បានចោទប្រកាន់បុរសជនជាតិអ៊ីរ៉ង់ បីនាក់ពីបទល្មើស ក្រោមច្បាប់សន្តិសុខជាតិ បន្ទាប់ពីការស៊ើបអង្កេតប្រឆាំងភេរវកម្មដ៏ធំមួយ។

នគរបាលប្រឆាំងភេរវកម្មអង់គ្លេស បានចាប់ខ្លួនបុរស ៨នាក់ ក្នុងនោះជនជាតិអ៊ីរ៉ង់ ៧នាក់ កាលពីដើមខែនេះ ក្នុងប្រតិបត្តិការពីរដាច់ដោយឡែកពីគ្នា នៅក្នុងអ្វីដែលរដ្ឋមន្ត្រីក្រសួងមហាផ្ទៃអង់គ្លេសហៅថា ការស៊ើបអង្កេតដ៏ធំបំផុតមួយចំនួននៃការប្រឆាំងភេរវកម្មរបស់ពួកគេ ក្នុងប៉ុន្មានឆ្នាំថ្មីៗនេះ។

នគរបាល បាននិយាយនៅក្នុងសេចក្តីថ្លែងការណ៍មួយថា លោក Mostafa Sepahvand, លោក Farhad Javadi Manesh និងលោក Shapoor Qalehali Khani Noori ត្រូវបានចោទប្រកាន់ពីបទចូលរួម ក្នុងការប្រព្រឹត្តដែលទំនងជាជួយដល់សេវាចារកម្មបរទេស នៅចន្លោះថ្ងៃទី ១៤ ខែសីហា ឆ្នាំ ២០២៤ និងថ្ងៃទី ១៦ ខែកុម្ភៈ ឆ្នាំ ២០២៥។ 

ពួកគេបានបន្ថែមថា រដ្ឋបរទេសដែលមានការចោទប្រកាន់ គឺអ៊ីរ៉ង់។

រដ្ឋមន្ត្រីការបរទេសអ៊ីរ៉ង់ លោក Abbas Araqchi ធ្លាប់បាននិយាយថា លោកមានការរំខាន នៅពេលដឹងថា ពលរដ្ឋអ៊ីរ៉ង់ ត្រូវបានចាប់ខ្លួនដោយអាជ្ញាធរអង់គ្លេស។