រដ្ឋមន្ត្រីការបរទេសលោក David Lammy បាននិយាយនៅថ្ងៃសៅរ៍ (ទី១៧ ខែឧសភា)នេះថា ចក្រភពអង់គ្លេស កំពុងធ្វើការជាមួយសហរដ្ឋអាមេរិក ដើម្បីធានាថា បទឈប់បាញ់ រវាងឥណ្ឌា និងប៉ាគីស្ថាន មានរយៈពេលវែង ហើយថា «វិធានការកសាងទំនុកចិត្ត»និងកិច្ចសន្ទនា កំពុងកើតឡើង។

លោក Lammy បានប្រាប់សារព័ត៌មានរ៉យទ័រ នៅរដ្ឋធានីអ៊ីស្លាម៉ាបាដរបស់ប្រទេសប៉ាគីស្ថានថា៖«យើងនឹងបន្តធ្វើការជាមួយសហរដ្ឋអាមេរិក ដើម្បីធានាថា យើងទទួលបានបទឈប់បាញ់យូរអង្វែង ដើម្បីធានាថា ការសន្ទនាកំពុងកើតឡើង និងធ្វើការតាមរយៈប៉ាគីស្ថាន និងឥណ្ឌា ពីរបៀបដែលយើងអាចទទួលបាន នូវទំនុកចិត្ត និងវិធានការកសាងទំនុកចិត្តរវាងភាគីទាំងពីរ»។

គូប្រជែងសំខាន់អាស៊ីខាងត្បូងដែលមានអាវុធនុយក្លេអ៊ែរ បានព្រមព្រៀងគ្នាកាលពីថ្ងៃទី ១០ ខែឧសភា ចំពោះបទឈប់បាញ់ នៅក្នុងការប្រយុទ្ធដ៏អាក្រក់បំផុតរបស់ពួកគេ ក្នុងរយៈពេលជិត ៣ទសវត្សរ៍ ដែលបានកើតឡើងបន្ទាប់ពីការវាយប្រហារដ៏សាហាវ ទៅលើភ្ញៀវទេសចរដែលទីក្រុងញូវដែលលីបន្ទោសទៅលើទីក្រុងអ៊ីស្លាម៉ាបាត។ ប្រទេសប៉ាគីស្ថាន បានបដិសេធថា ពុំមានការជាប់ពាក់ព័ន្ធទេ។

នៅពេលសួរអំពីការផ្អាកសន្ធិសញ្ញាទឹករបស់ឥណ្ឌា ដែលអាចធ្វើឲ្យការផ្គត់ផ្គង់ទឹករបស់ប៉ាគីស្ថានដ៏មានសក្តានុពលនោះ លោក Lammy បាននិយាយថា៖«យើងនឹងជំរុញឲ្យភាគីទាំងអស់បំពេញកាតព្វកិច្ចសន្ធិសញ្ញារបស់ពួកគេ»។

ប៉ាគីស្ថានបាននិយាយថា អង់គ្លេស និងប្រទេសផ្សេងទៀត បន្ថែមពីលើសហរដ្ឋអាមេរិក បានដើរតួនាទីយ៉ាងសំខាន់ ក្នុងការកាត់បន្ថយការប្រយុទ្ធគ្នានេះ។ អ្នកការទូត និងអ្នកវិភាគ និយាយថា បទឈប់បាញ់នៅតែផុយស្រួយ។