ទឹកជំនន់ធ្ងន់ធ្ងរបានវាយប្រហារទីក្រុង Campana របស់ប្រទេសអាហ្សង់ទីនកាលពីថ្ងៃសៅរ៍ បណ្តាលឲ្យមានការជម្លៀសខ្លួនមនុស្សទ្រង់ទ្រាយធំ ពេលដែលអ្នកស្រុកមិនអាចទប់ទល់នឹងកម្រិតទឹកឡើងយ៉ាងឆាប់រហ័សបែបនេះ ។

ប្រជាពលរដ្ឋបានប្រើប្រាស់ទូក ដើម្បីទឹកជញ្ជូនទ្រព្យសម្បត្តិរបស់ពួកគេទៅកាន់ទីទួលសុវត្ថិភាព ខណៈទឹកឡើងដល់ចង្កេះ ។

អ្នកស្រី Luana Isabel Bello គឺជាពលរដ្ឋមួយរូបរស់នៅក្នុងទីក្រុង Campana និយាយថា ពួកយើងចាប់ផ្តើមជម្លៀសខ្លួន ដោយសារកម្រិតទឹកឡើងយ៉ាងឆាប់រហ័សខ្លាំងពេក ហើយវាគឺជាគ្រោះមហន្តរាយធម្មជាតិមួយសម្រាប់ពួកយើង ។

សេវាកម្មឧតុនិយមជាតិអាហ្សង់ទីន ដែលបានចេញសេចក្តីប្រកាសអាសន្នកម្រិតពណ៌ក្រហមកាលពីថ្ងៃសុក្រ បានរាយការណ៍ពីកម្រិតទឹកភ្លៀងកម្ពស់ ១៥០មីលីម៉ែត្រ និង ២៥០មីលីម៉ែត្រ នៅទីក្រុង Zarate និងទីក្រុង Arrecifes ហើយពួកគេបានព្រមានផងដែរពីប្រព័ន្ធព្យុះ ដែលបង្កឲ្យមានភ្លៀងធ្លាក់ខ្លំាងបន្ថែមទៀត ៕