ជនប៉ាឡេស្ទីនរាប់រយនាក់នៅតំបន់ហ្កាហ្សា ត្រូវបានសម្លាប់ក្នុងសប្តាហ៍នេះ ស្របពេលដែលកងកម្លាំងអ៊ីស្រាអែល បង្កើនការវាយប្រហារតាមច្រកអាកាស និងការវាយប្រហារតាមជើងគោកថ្មីរបស់ពួកគេ ។

ក្រុមអាជ្ញាធរសុខភាពប៉ាឡេស្ទីន និយាយថា មនុស្សយ៉ាងហោច ១៤៦នាក់ ត្រូវបានសម្លាប់នៅថ្ងៃទី ៣នៃការយុទ្ធនាការទម្លាក់គ្រាប់បែករបស់អ៊ីស្រាអែល ដែលស្ថិតក្នុងចំណោមរលកវាយប្រហារស្លាប់មនុស្សច្រើនបំផុត ចាប់តាំងពីបទឈប់បាញ់ដួលរលំកាលពីខែមីនា ។

មនុស្សរាប់រយនាក់ផ្សេងទៀតដែលរងរបួស ទទួលបានការព្យាបាលនៅមន្ទីរពេទ្យ ហើយមនុស្សជាច្រើនទៀត បានកប់ក្រោមគំនរបាក់បែកអគារ ។

យោធាអ៊ីស្រាអែល បានចេញបញ្ជាឲ្យជម្លៀសខ្លួននៅតាមតំបន់ជាច្រើនក្នុងទីក្រុងហ្កាហ្សា ហើយនិងនៅតំបន់ភាគខាងជើងហ្កាហ្សា រួមទាំងទីក្រុង Jabalia និងទីក្រុង Beit Lahiya បង្ខំឲ្យជនប៉ាឡេស្ទីនរាប់ម៉ឺនាក់ចាកចេញពីទីជម្រករបស់ពួកគេ ។

ក្រសួងសុខភាពហ្កាហ្សា និយាយថា ការវាយប្រហាររបស់អ៊ីស្រាអែលកាលពីថ្ងៃអង្គារ បានសម្លាប់អ្នកសារព័ត៌មានដ៏ល្បីមួយរូបរបស់ប៉ាឡេស្ទីនគឺលោក Hassan Aslih ដែលអ៊ីស្រាអែលបានចោទប្រកាន់ថា ធ្វើការជាមួយក្រុមហាម៉ាស និងជាអ្នកដែលកំពុងទទួលការព្យាបាលក្នុងមន្ទីរពេទ្យ ក្រោយរងរបួសពីការវាប្រហារលើកមុន ។

នៅថ្ងៃអង្គារនោះដែរ ក្រសួងសុខាភិបាលហ្កាហ្សា និយាយថា មីស៊ីល ៩គ្រាប់ បានវាយប្រហារមន្ទីរពេទ្យអឺរ៉ុបនៅភាគខាងត្បូងតំបន់ហ្កាហ្សា ដោយបានសម្លាប់មនុស្សយ៉ាងហោច ១៦នាក់ និងមនុស្ស ៧០នាក់ផ្សេងទៀត រងរបួស ។

ខណៈពេលនោះដែរ សារព័ត៌មានអ៊ីស្រាអែល រាយការណ៍ថា ក្រុមមន្រ្តីសន្តិសុខមានជំនឿថា មេដឹកនាំយោធាហាម៉ាសលោក Mohammad Sinwar និងមន្រ្តីជាន់ខ្ពស់ជាច្រើនទៀតរបស់ពួកគេ ត្រូវបានសម្លាប់នៅក្នុងការវាយប្រហារមួយលើទីបញ្ជាការស្ថិតនៅពីក្រោមមន្ទីពេទ្យអឺរ៉ុប ក្នុងទីក្រុង Khan Younis ៕