​បាល់ទាត់៖ ​ខ្សែប្រយុទ្ធ​ថៃ Teerasil Dangda បាន​ក្លាយជា​កីឡាករ​ដែល​ស៊ុត​បញ្ចូល​ទី​ច្រើនជាងគេ​ ក្នុង​ប្រវត្តិសាស្ត្រ​ពានរង្វាន់បាល់ទាត់​តំបន់​អាស៊ីអាគ្នេយ៍ AFF Championship ហើយ​ក្រោយ​រកបាន​ពីរ​គ្រាប់​ម្នាក់ឯង​ឱ្យ​ថៃ​យកឈ្នះ​ហ្វីលីពីន ២-១ ឡើង​វគ្គ​ពាក់កណ្តាល​ផ្តាច់ព្រ័ត្រ​។ ​​ចំណែក​ហ្វីលីពីន​ក៏​អស់​កៅអី​ទៅ​វគ្គ​បន្ត​ដែរ​ក្រោយ​បរាជ័យ​នេះ​។

​​លេង​បាន ២៦នាទី Theerathon Bunmathan គឺជា​អ្នក​បញ្ចូល​បាល់​កាត់​យ៉ាង​ល្អ​ឱ្យ Teerasil Dangda បើក​ការ​នាំមុខ មុន​ពេលដែលហ្វីលីពីន​ក៏តា​ម​ស្មើ​វិញ​នៅ​វគ្គ​ទី២ នាទី​ទី៥៧ ដោយ Patrick Reichelt​។ ​​ក្រោយមក​ថៃ​ក៏មាន​ឱកាស​រក​គ្រាប់​ជ័យជំនះ​នៅពេល Thitipan Puangjan ដួល​ក្នុង​ប្រអប់​គ្រោះថ្នាក់​ខណៈ Teerasil Dangda ដដែល​គឺជា​អ្នក​ស៊ុត​សំរេច​គ្រាប់​បាល់​ពិន័យ ១១ម៉ែត្រ​នៅ​នាទី​ទី៧៨​។ ​​ពីរ​គ្រាប់​របស់ Teerasil Dangda បានធ្វើ​ឱ្យគេ​ក្លាយជា​អ្នក​ស៊ុត​បញ្ចូល​ទី​ច្រើន​គេ ​ក្នុង​ប្រវត្តិសាស្ត្រ​ពាន​តំបន់​អាស៊ាន​នេះ​ដោយមាន​សរុប ១៩គ្រាប់​បំបែក​កំណត់ត្រា​ចាស់​របស់​ខ្សែប្រយុទ្ធ​សិង្ហ​បុរី Nor Alam Shar ដែលមាន ១៧គ្រាប់​សរុប​។

​ក្រោយ​ចប់​ការប្រកួត​គ្រូបង្វឹក​ថៃ Alexandre Polking ឱ្យដឹងថា នេះ​ជាការ​ប្រកួត​ដ៏​លំបាក​មួយ​សំរាប់​ក្រុម​របស់លោក ​ខណៈ​ភាគី​ខាង​ហ្វីលីពីន​គេ​ត្រូវការ​ឈ្នះ​ដាច់ខាត ដូច្នេះ​ពួកគេ​សម្រុក​ខ្លាំង​នៅពេល​ថៃ​នាំមុខ យ៉ាងណាក្តី​កូនក្រុម​របស់លោក​អាចធ្វើ​បាន​នូវ​ជ័យជំនះ​ដ៏​មាន​សារសំខាន់​នេះ​។ ​​ចំណែក​គ្រូបង្វឹក​ហ្វីលីពីន​លោក Stewart Hall ថា ក្រុម​របស់លោក​ប្រឹង​អស់ពី​លទ្ធភាព​ហើយ​តែ​បាល់ ១១ម៉ែត្របានសំរេច​កត្តា​ចាញ់ឈ្នះ​ហ្វីលីពីន​ ខណៈ​ក្រុម​របស់លោក​ធ្វើបាន​ល្អ​ហើយ​សំរាប់​ការប្រកួត​នេះ​។ ​​ទោះ​នៅសល់​មួយ​ប្រកួត​ទៀត​ទើប​ចប់​វគ្គ​វិលជុំ​ក្នុង​ពូ​ល តែ​ក្រុម​ជើងឯក​ ៥​សម័យកាល​ថៃ​បាន​កក់​កៅអី​នៅ​វគ្គ​បន្ត​ទៅហើយ​ក្រោយ​ឈ្នះ ៣ប្រកួត​ផ្ទួនៗ​មាន ៩ពិន្ទុ​ពេញ ខណៈ​ហ្វីលីពីន​អស់​ឱកាស​ហើយ​ក្រោយ​មានតែ ៣ពិន្ទុ​៕

​អត្ថបទ​៖​នាង សុភា​វុ​ធ