មនុស្សរាប់ម៉ឺននាក់បានប្រមូលផ្តុំគ្នាជុំវិញពិភពលោកនៅថ្ងៃសៅរ៍ចុងសប្ដាហ៍នេះ ក្នុងសាមគ្គីភាពជាមួយប៉ាឡេស្ទីន ស្របពេលមានសង្រ្គាមដ៏បង្ហូរឈាមរបស់អ៊ីស្រាអែល នៅលើតំបន់ហ្កាហ្សា និងដើម្បីប្រារព្ធទិវាបោសសម្អាតជនជាតិប៉ាឡេស្ទីនឆ្នាំ១៩៤៨ ដោយកងជីវពលជ្វីហ្វ គឺទិវាជម្លៀសខ្លួនទាំងហ្វូងពីទឹកដីកំណើត ណាក់បា (Nakba) ឬប្រែថា "គ្រោះមហន្តរាយ" កាលពីថ្ងៃ១៥ ឧសភា។

ព្រឹត្តិការណ៍ណាក់បា បណ្តាលឱ្យមានការផ្លាស់ទីលំនៅជាអចិន្ត្រៃយ៍នៃប្រជាជនប៉ាឡេស្ទីន បន្ទាប់ពីការបង្កើតរដ្ឋអ៊ីស្រាអែល នៅឆ្នាំ១៩៤៨។ សកម្មជននិយាយថា ប្រវត្តិសាស្រ្តកំពុងកើតឡើងម្តងទៀតនៅសព្វថ្ងៃនេះនៅក្នុងដែនដីហ្កាហ្សា និងតំបន់កាន់កាប់ វេសបែង។

នៅទីក្រុងស្តុកខុម មនុស្សរាប់ពាន់នាក់ប្រមូលផ្តុំគ្នានៅទីលានចតុរង្គ Odenplan ដោយឆ្លើយតបទៅនឹងការអំពាវនាវពីអង្គការសង្គមស៊ីវិលជាច្រើន ដើម្បីតវ៉ាប្រឆាំងការវាយប្រហាររបស់អ៊ីស្រាអែល លើតំបន់ហ្កាហ្សា។ ទន្ទឹមនឹងនេះ នៅទីក្រុងឡុងដ្រ៍ ចក្រភពអង់គ្លេស មនុស្សរាប់សែននាក់ដើរដង្ហែឆ្ពោះទៅកាន់ផ្លូវ Downing Street ទាមទារឱ្យបញ្ចប់នូវអ្វីដែលពួកគេពិពណ៌នាថា អំពើប្រល័យពូជសាសន៍របស់អ៊ីស្រាអែល នៅហ្កាហ្សា ដែលមានអាយុកាល ៧៧ឆ្នាំ បន្ទាប់ពីព្រឹត្តិការណ៍ណាក់បា។

នៅទីក្រុងប៊ែរឡាំង ប្រទេសអាល្លឺម៉ង់ ប្រជាជនបានប្រមូលផ្តុំគ្នាតវ៉ាប្រឆាំងការវាយប្រហារលើតំបន់ហ្កាហ្សា ខណៈការដង្ហែរក្បួនសាមគ្គីភាពបែបនេះត្រូវបានប្រារព្ធឡើងនៅទីក្រុងអាតែន ប្រទេសក្រិក ជាទីដែលក្រុមបាតុករកាន់ទង់ជាតិប៉ាឡេស្ទីន និងបានដើរដង្ហែជាលើកដំបូងទៅកាន់ស្ថានទូតសហរដ្ឋអាមេរិក និងអ៊ីស្រាអែល ព្រមទាំងនៅកន្លែងផ្សេងទៀតទូទាំងពិភពលោក៕