រដ្ឋមន្រ្តីក្រសួងរតនាគារជាតិរបស់សហរដ្ឋអាមេរិក លោក Scott Bessent បាននិយាយនៅក្នុងបទសម្ភាសន៍តាមទូរទស្សន៍កាលពីថ្ងៃអាទិត្យ (១៨ ឧសភា) ថា លោកប្រធានាធិបតី Donald Trump នឹងអនុវត្តពន្ធតាមអត្រាដែលលោកបានគំរាមកំហែងកាលពីខែមុន លើដៃគូពាណិជ្ជកម្មដែលមិនចរចាដោយ "ស្មោះត្រង់" លើកិច្ចព្រមព្រៀង។

លោក Bessent មិនបានបញ្ជាក់ទេថា តើការចរចា "ដោយស្មោះត្រង់" បែបណាដែលអាមេរិកចង់បាន ហើយក៏មិនបង្ហាញពីពេលវេលាប្រកាសការសម្រេចចិត្តណាមួយនោះដែរ ជុំវិញការដាក់ពន្ធបដិការឡើងវិញក្នុងអត្រាផ្សេងៗគ្នាដូចដែលលោក Trump បានដាក់ជាលើកដំបូងនៅថ្ងៃទី០២ ខែមេសា។

លោក Trump បានប្តូរចិត្តម្តងហើយម្តងទៀតចាប់តាំងពីពេលនោះមក ជាពិសេសនៅថ្ងៃទី០៩ ខែមេសា នៅពេលដែលលោកទម្លាក់អត្រាពន្ធលើទំនិញនាំចូលភាគច្រើនមកត្រឹម ១០% សម្រាប់ពេល ៩០ថ្ងៃ ដើម្បីទុកពេលចរចាបង្កើតកិច្ចព្រមព្រៀងជាមួយប្រទេសដទៃ។ លើសពីនេះ លោកក៏បានបញ្ចុះពន្ធលើទំនិញចិនដោយឡែកពីគ្នាមកត្រឹម ៣០% ហើយកាលពីថ្ងៃសុក្រសប្ដាហ៍មុន លោកបានបញ្ជាក់ជាថ្មីថា រដ្ឋបាលរបស់លោកនឹងផ្ញើលិខិតប្រាប់ប្រជាជាតិនានាពីអត្រាពន្ធរបស់ពួកគេ។

ក្នុងកិច្ចសម្ភាសន៍កាលពីថ្ងៃអាទិត្យ លោក Bessent បាននិយាយថា រដ្ឋបាលអាមេរិកផ្តោតលើទំនាក់ទំនងពាណិជ្ជកម្មដ៏សំខាន់បំផុតចំនួន១៨ របស់ខ្លួន ហើយថា ពេលវេលានៃកិច្ចព្រមព្រៀងណាមួយក៏នឹងអាស្រ័យលើថាតើប្រទេសទាំងនោះចរចាដោយស្មោះត្រង់ឬទេ ហើយលិខិតបញ្ជាក់អត្រាពន្ធនឹងដាក់ចេញទៅកាន់ប្រទេសដែលចរចាមិនស្មោះត្រង់។

សង្រ្គាមពាណិជ្ជកម្មដែលកំពុងបន្តរបស់លោក Trump បានរំខានយ៉ាងធ្ងន់ធ្ងរដល់លំហូរពាណិជ្ជកម្មពិភពលោក និងធ្វើឱ្យទីផ្សារហិរញ្ញវត្ថុរង្គោះរង្គើ ខណៈវិនិយោគិនជួបបញ្ហាជាមួយអ្វីដែលលោក Bessent បានហៅថា "ភាពមិនប្រាកដប្រជាជាយុទ្ធសាស្ត្រ" របស់ប្រធានាធិបតីមកពីបក្សសាធារណរដ្ឋរូបនេះ ក្នុងការជំរុញរបស់លោកដើម្បីកែទម្រង់ទំនាក់ទំនងសេដ្ឋកិច្ចឱ្យល្អចំពោះសហរដ្ឋអាមេរិក៕