របាយការណ៍វិភាគថ្មីមួយបានបង្ហាញថា អសន្តិសុខស្បៀងធ្ងន់ធ្ងរនៅតែបន្តកើនឡើងទូទាំងសកលលោកក្នុងកម្រិតប្រកាសអាសន្ន ដោយមនុស្សប្រមាណជិត ៣០០លាននាក់ ប្រឈមមុខនឹងហានិភ័យនៃការស្លាប់ដោយសារតែភាពអត់ឃ្លាន។

ការកើនឡើងនៃជម្លោះ និងការកាត់ជំនួយមនុស្សធម៌ រួមជាមួយនឹងបម្រែបម្រួលអាកាសធាតុ និងសេដ្ឋកិច្ច បានបង្ខំឱ្យមនុស្ស ១៣,៧លាននាក់បន្ថែមទៀត ធ្លាក់ចូលក្នុងអសន្តិសុខស្បៀងរ៉ាំរ៉ៃកាលពីឆ្នាំមុន។

របាយការណ៍ចុងក្រោយបំផុតរបស់ទីភ្នាក់ងារវិបត្តិពិភលោក ហៅកាត់ថា GRFC បានបង្ហាញថា នេះជាឆ្នាំទី៦ ជាប់ៗគ្នាហើយដែលចំនួនមនុស្សប្រឈមមុខនឹង "កម្រិតខ្ពស់នៃអសន្តិសុខស្បៀងធ្ងន់ធ្ងរ" បានកើនឡើងដល់ ២៩៥,៣លាននាក់។ តួលេខនេះតំណាងឱ្យស្ទើរតែ ១ភាគ៤ ឬ ២២,៦% នៃចំនួនប្រជាជន ៥៣ប្រទេស ដែលត្រូវបានវិភាគដោយក្រុមអ្នកជំនាញ GRFC។

ប្រជាជនប្រឈមមុខនឹងកង្វះខាតស្បៀងអាហាររ៉ាំរ៉ៃបំផុត - ដែលត្រូវបានចាត់ថ្នាក់ដោយអង្គការបែងចែកណាក់កាលសន្តិសុខស្បៀងអាហាររួម IPC គាំទ្រដោយអង្គការសហប្រជាជាតិ - បានកើនឡើងជាងពីរដងកាលពីឆ្នាំមុន។ ប្រជាជននៅស៊ូដង់ រងគ្រោះខ្លាំងបំផុត ដោយសង្គ្រាមស៊ីវិលកាន់តែអាក្រក់ទៅៗបាននាំឱ្យមានគ្រោះទុរ្ភិក្សជាផ្លូវការ ជាមួយនឹងមនុស្សជាង ២៤លាននាក់ ប្រឈមនឹងអសន្តិសុខស្បៀងធ្ងន់ធ្ងរ។

ទន្ទឹមនឹងនេះ លក្ខខណ្ឌក៏កាន់តែយ៉ាប់យ៉ឺននៅក្នុងតំបន់ហ្កាហ្សាស្ទ្រីប ដោយអ្នកជំនាញកាលពីឆ្នាំមុនបានបញ្ជាក់ថា ពាក់កណ្តាលនៃចំនួនប្រជាជនសរុបត្រូវបានព្យាករថា កំពុងទទួលរងនូវស្ថាបភាព "ដ៏មហន្តរាយ" នៃភាពអត់ឃ្លានធ្ងន់ធ្ងរ៕