ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តី បានបញ្ជាក់ថា កម្ពុជាគ្មានសិទ្ធិអ្វីទៅអាកាត់លើជម្លោះដែនសមុទ្រចិនខាងត្បូងនោះទេ ហើយសូមភាគីពាក់ព័ន្ធទាំងអស់កុំឲ្យកម្ពុជាធ្វើជាចៅក្រមកាត់សេចក្តីលើករណីនេះ ខណៈសម្តេចលើកទឹកចិត្ត និងអំពាវនាវចំពោះប្រទេសដែលពាក់ព័ន្ធទាំងអស់ គប្បីរកដំណោះស្រាយគ្នាដោយសន្តិវិធី។

ថ្លែងនៅក្នុងកម្មវិធីសម្ពោធដាក់ឲ្យប្រើប្រាស់នូវសណ្ឋាគារហៃយ៉ាត់ រីជិនស៊ី ភ្នំពេញ នាព្រឹកថ្ងៃទី ១៥ ខែធ្នូ នេះសម្តេចតេជោ ហ៊ុន សែន បានបញ្ជាក់ថា គោលជំហរបស់កម្ពុជាគឺនៅដដែល ទាក់ទង​នឹង​សមុទ្រចិនខាងត្បូងនេះ​ ពោលគឺកម្ពុជា ​បន្តអំពាវនាវឲ្យអនុវត្តតាមសេចក្តីថ្លែងការណ៍ ស្តីពីការ​ប្រតិបត្តិ​របស់​ភាគី​ពាក់ព័ន្ធ​នៃសមុទ្រចិនខាងត្បូង(Doc) អំពាវនាវឲ្យរកដំណោះស្រាយគ្នា​ដោយ​សន្តិវិធី និងត្រូវខិតខំប្រឹងប្រែងសម្រេចឲ្យបានូវក្រមប្រតិបត្តិ​នូវក្នុង​ជន្លោះ​សមុទ្រចិន​ខាងត្បូង​(Coc)​ជាដើមនោះ។

ទាក់ទងនឹងបញ្ហាសមុទ្រខាងត្បូងនេះផងដែរ សម្តេចតេជោ ហ៊ុន សែន នាយករដ្ឋមន្រ្តីក៏បាន លើក​ឡើង​ផងដែរថា ការដែលកម្ពុជាមិនអាចចេញនូវសេចក្តីថ្លែការណ៍​បានកាលពីឆ្នាំ២០១២ ​ក្នុង​អំឡុង​ពេល​ដែលកម្ពុជាធ្វើជាម្ចាស់ផ្ទះនៃកិច្ចប្រជុំអាស៊ាន ​ដោយ​ដោយសារតែភាគីពាក់ព័ន្ធខ្លះបាន បាន​បង្ខិតបង្ខំ​ឲ្យកម្ពុជាទទួលស្គាល់កោះនេះ ជាប្រទេសនេះ ឬកោះនោះ​ជារបស់ប្រទេសនោះជាដើម ហើយបែជាចោទប្រកាន់កម្ពុជាថា​បានកាន់ជើងចិនទៅវិញ។

សូមបញ្ជាក់ថា ប្រទេសដែលជាប់ពាក់ព័ន្ធនឹងដែនសមុទ្រចិនខាងត្បូង មាន​ចំនួនបួនប្រទេស នៅ​ក្នុង​តំបន់អាស៊ាន​ គឺប្រទេសហ្វីលីពីន ប្រទេសវៀតណាម​ ប្រទេសម៉ាឡេស៊ី និង​ប្រទេស​ប្រុណណេជាដើម។

យ៉ាងណាក៏ដោយសម្តេចតេជោ ហ៊ុន សែន ​បានអំពាវនាវឲ្យភាគីពាក់ព័ន្ធទាំងអស់ត្រូវមានដំ ណោះ​ស្រាយ​ដោយសន្តិវិធី ​ហើយសម្តេចរំពឹងថា​ ភាគីពាក់ព័ន្ធទាំងអស់នឹងខិតខំប្រឹងប្រែងចុះហត្ថលេខា ព្រមព្រៀង ​Coc សម្រេចឲ្យបាននៅក្នុងឆ្នាំ២០២២ខាងមុខនេះ ខណៈដែលប្រទេសកម្ពុជា​ធ្វើ​ជា​ម្ចាស់​ផ្ទះកិច្ចប្រជុំអាស៊ានប្តូរវេន ហើយបន្ទាប់ពីសម្រេចបានភាគីពាក់ព័ន្ធទាំងអស់ ទាំងអាស៊ាន និងចិនគឺ សប្បាយរួមគ្នាផងដែរ៕

អត្ថបទ៖ បាន ចក់